Россиядә ир-атлар хатын-кызларга караганда уртача 10 елга кимрәк яши. Сәламәтлек саклау министры Михаил Мурашко әйтүенчә, көчле затларның эчү-тарту кебек зарарлы гадәтләренә, шулай ук сәламәтлекне тиешенчә кайгыртмауларына бәйле бу.
Министр сүзләренә караганда, балага уза алмау очракларының 50 проценты ир-ат сәламәтлегендәге кимчелекләргә бәйле. Бу, һичшиксез, демографик вазгыятьтә тискәре чагылыш таба. Әлеге мәсьәләне хәл кылу өчен диспансеризация кысасында ир-атлар һәм хатын-кызларның сәламәтлеге тикшерелә. Мурашко фикеренчә, җенси органнардагы авыруларны вакытында ачыклап, балага уза алмаучылар санын киметү мөмкинлеге бирергә тиеш бу.
Сүз уңаеннан, «Росстат» мәгълүматлары буенча, илдә ир-атларның уртача гомер озынлыгы 67 яшь тәшкил итә.
