Россиядә кайбер гражданнар берьюлы ике пенсия алырга хокуклы. Бу хакта Дәүләт Думасының Хезмәт һәм социаль сәясәт комитеты җитәкчесе Ярослав Нилов әйтте. РИА Новости шул хакта яза.
Мондый мөмкинлек пенсия законнарында каралган,ул дәүләт алдында аерым казанышлары булган яки гадәттән тыш хәлләрдә зыян күргән гражданнарга гына кагыла. Алар исәбенә Бөек Ватан сугышында катнашучылар, блокададагы Ленинград һәм Севастополь халкы, Чернобыль АЭСындагы фаҗига нәтиҗәләрен юк итүчеләр, шулай ук хәрби җәрәхәтләрдән инвалид калучылар керә. Бу категорияләр бер үк вакытта картлык буенча иминият пенсиясе һәм инвалидлык буенча дәүләт пенсиясе дә алырга хокуклы.
Аерым кагыйдәләр хәрби хезмәткәрләр, көч структуралары хезмәткәрләре, космонавтлар һәм очучылар өчен гамәлдә. Тиешле елларын эшләп пенсиягә чыкканнан соң, алар гомумбилгеләнгән пенсия яшенә җиткәч, картлык буенча иминият пенсиясен дә рәсмиләштерергә хокуклы, тик билгеләнгән түләүләр булмаячак.
Депутат инвалид балаларга аерым игътибар бирде: әгәр аларның әти-әниләре махсус хәрби операция барышында һәлак булса, алар туендыручысын югалту сәбәпле, икенче пенсиягә дә хокуклы.
Нилов сүзләренчә, һәр пенсия үз кагыйдәләре буенча билгеләнә һәм төрле чыганаклардан түләнә: дәүләт пенсиясе – федераль бюджеттан, ә иминият пенсиясе – Россия Социаль фонды аша. Рәсмиләштерү өчен пенсия белән тәэмин итүнең һәр төренә хокукны раслый торган документларның тулы пакетын тапшырырга кирәк. Шул ук вакытта гражданнарның күпчелеге өчен гомуми кагыйдә гамәлдә: берничә төр пенсиягә хокук булган очракта бары тик берсе генә билгеләнә – аны алучы үзе сайлый.
Сүз уңаеннан, хәзерге вакытта Татарстанда “Кадрлар” илкүләм проекты гамәлгә ашырыла.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез