Татарстан Республикасы Рәисе Кукмарада 3 нче урта мәктәпнең яңа корпусын ачу тантанасында катнашты. Яңа корпус 375 урынга исәпләнгән. Биредә башлангыч сыйныфлар урнашачак. Бинада иркен һәм якты сыйныф бүлмәләре, туган тел кабинетлары, спорт залы, ял зоналары, актлар залы, административ һәм укыту-ярдәмче кабинетлар бар. Медицина комплексы табиб кабинетыннан һәм процедура кабинетыннан тора. Ашханә 188 урынлы төшке аш залын, төрле цехларны һәм азык-төлек саклау бүлмәләрен үз эченә ала.
Рөстәм Миңнеханов билгеләп үткәнчә, мәктәптә балаларны тулысынча укыту һәм үстерү өчен барлык шартлар да тудырылган. «Котлыйм сезне! Мәктәп өчен яңа корпус кирәк иде, монда бик күп балалар укый. Җәй көне биредә балалар өчен мәктәп лагерьлары оештырыла», – диде ТР Рәисе.
Кукмара районы башлыгы Сергей Димитриев республика җитәкчелегенә мәгариф инфраструктурасын үстерү буенча зур эшләре өчен рәхмәт белдерде.
2010 елдан башлап, республикада гомуми белем бирүнең 110 объекты төзелде, шуның нәтиҗәсендә 71 меңнән артык яңа урын булдырылды.
Рәис шулай ук «Мәктәпкә җыенырга ярдәм ит» республика хәйрия акциясендә катнашты. Әлеге акция 2007 елдан бирле уздырыла. Ул баланы мәктәпкә әзерләгәндә өстәмә ярдәм таләп ителгән гаиләләргә булышуны күздә тота. Балалар кирәкле канцтоварларның тулы комплекты булган мәктәп портфельләрен ала. Бүген аларны 20 беренче сыйныф укучысына тапшырдылар. Уку елы башына Кукмара районында 1-11 сыйныфлардан 362 бала комплектларга ия булачак.
Шуннан соң Рөстәм Миңнеханов бер ел элек ремонт-реставрация эшләре башкарылган туган якны өйрәнү музеенда булды. Музей 1995 елның 8 маенда абыйлы-энеле Родигиннар иптәшлегенең элеккеге киез аяк киеме фабрикасы бинасында ачылган. 1997 елда бина архитектура һәйкәлләре реестрына кертелгән. Рөстәм Миңнехановка экспозицияләр күрсәттеләр, аерым алганда, музейда район барлыкка килүгә, предприятиеләргә, шулай ук Үтәмышевлар, Чыңгыз Айтматов шәҗәрәсенә багышланган күргәзмә оештырылган.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез