Чаллыда Ашыгыч медицина ярдәме хастаханәсе табиблары йөрәгенә шеш үскән 68 яшьлек хатын-кызны үлемнән коткарып калган. Хастаханәнең матбугат хезмәтеннән хәбәр ителгәнчә, аны сулышы бик нык кысылган хәлдә кардиология бүлегенә китергәннәр. УЗИ йөрәгендә шеш барлыгын күрсәткән. Моңа кадәр хатын-кызда меланома булганлыктан, табибларга, шуның метастазы түгелме икән, дигәнрәк шик төшкән. Бу хакта “Татар-информ” яза.
“Йөрәктәге шешнең зурлыгы 6*8 сантиметрга җиткән иде. Киң ягы белән йөрәкнең алгы өлешенә ябышып үскән, йомшак, виноград тәлгәшен хәтерләтә. Шуңа күрә, алганда, өлешләргә таркала башлады. Безнең төп бурыч – йөрәкне шештән арындыру гына түгел, бәлки аның кабат пәйда булуына да юл куймау иде”, – ди йөрәк-кан тамырлары хирургы Гарма Майоров.
Кардиологлар бик катлаулы операция ясаган: виноград тәлгәшен хәтерләткән шешне кисеп алган. Шеш кабат пәйда булмасын өчен йөрәкнең зыян килгән өлешен махсус прибор – криозонд белән) катырган. Шулай ук табиблар шеш аркасында “яньчелгән” йөрәк клапанын элекке рәвешенә кайтарган.
Операциядән соң шешнең яман шеш булмавы ачыкланган. Хатын-кыз инде өенә – гаиләсе янына кайтарып җибәрелгән. Хәзер ул үзен яхшы хис итә.
Сүз уңаеннан, хәзерге вакытта Татарстанда “Һәр кешегә сәламәтлек” төбәк проекты гамәлгә ашырыла.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез