Татарстанда самолет һәлакәтендә исән калган ир-атны Мәскәүгә күчерәләр

Кама Тамагы районында җиңел моторлы самолет һәлакәтендә исән калган ир-атны бүген Республика клиник хастаханәсеннән Мәскәүдәге Склифосовский исемендәге фәнни-тикшеренү институтына озатканнар. Бу хакта “KazanFirst” яза.

Сырхауның хәле – уртача. Татарстанның Һәлакәтләр медицинасы үзәге бригадасы аны Арзамаска кадәр китереп, биредә Мәскәүдән килгән коллегаларына тапшыра.

Һәлакәтләр медицинасы үзәге бригадасына табиб Екатерина Җамалиева, фельдшер Рөстәм Сабиров һәм ике йөртүче – Таһир Туктамышев белән Фәрит Һадиуллин кергән.

Исегезгә төшерәбез: Кама Тамагында җиңел моторлы самолет һәлакәтендә 3 кешенең, шул исәптән 1 баланың гомере өзелде (барысы да – бер гаилә әгъзалары). Һәлакәттә бары тик гаилә башлыгы гына исән калды.

https://vatantat.ru/2024/07/146978/

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!