50 сум күләмендә бирелүче пособиенең 10 меңгә җитәчәге хакында ел башыннан имеш-мимешләр йөрде. Ниһаять, аңа ачыклык кертелде шикелле. Ул төбәкләрдәге яшәү минимумы күләмендә булачак, әмма һәрбер гаиләгә бирелмәячәк.
Төгәлрәк әйткәндә, Россия Дәүләт Думасына яшь ярымнан өч яшькә кадәр сабыйга түләнүче пособиене арттыру тәкъдиме керткәннәр, аны мохтаҗ ата-аналар гына алачак. Әлеге компенсацияне түләү системасына үзгәрешләр кертеләчәге хакында хөкүмәт җитәкчесе Дмитрий Медведев җиткерде. Яшәү минимумын һәр төбәк үзе билгели. Әйтик, Татарстанда ул сумма быел беренче кварталда 9 170 сум тәшкил итә. Җан башына исәпләгәндә, гаиләдәге хезмәткә яраклы кешенең уртача кереме ике яшәү минимумы суммасына тулмаган булырга тиеш, шул чагында гына гаилә аңа өметләнә ала. Үзәк матбугат чаралары хәбәр иткәнчә, бала үстерүче гаиләләргә пособие 2020 елның гыйнварыннан түләнә башларга мөмкин. Төгәл кистереп әйтмәүнең сәбәбе: закон проекты әле кабул ителмәгән. Татарстан Хезмәт, халыкны эш белән тәэмин итү һәм социаль яклау министрлыгы белгечләре бу уңайдан аңлатма бирергә ашыкмады. Бездә норматив документлар юк, ничек булачагы, аны кемнәр алуы, белешмәләрне ничек тапшырырга кирәклеге билгеле түгел, диделәр.
Социаль ярдәм буларак, 50 сум күләмендә пособие түләү карары 1994 елдан гамәлдә. Шул вакыт эчендә ул бер тапкыр да яңадан каралмаган, бәяләр гел үсештә булуга карамастан, индексация дә ясалмаган. Шуңа багышланган киңәшмәдә Дмитрий Медведев та: “Ул пособиенең күләме аңлашылып бетми һәм социаль ярдәм алай оештырылырга тиеш түгел”, – дип белдерде. Аның чыгышын тыңлагач, шундый фикергә киләсең: һәр гаиләгә аз-азлап, тигез итеп өлеш чыгарырга, дигән төшенчә искергән. Хәзер аз гаиләгә, ләкин күбрәк суммада эләксен, дигән принциптан чыгып эш итәчәкләр. Бүген яшь ярымга кадәр түләнүче пособиене төбәкләрдәге яшәү минимумы күләмендә 2 миллионнан артык гаилә ала. 1,5 яшьтән өч яшькәчә пособие 1,8 миллион кешегә түләнә. Дәүләт казнасыннан аның өчен якынча 1,5 миллиард сум акча бүленә, түләүне арттырып, адреслы яклауны үстерергә кирәк”, – дип белдерде Премьер-министр.
– Яшь ярымнан өч яшькәчә түләнүче 50 сум пособие бик күпләрдә канәгатьсезлек тудыра иде. Ул хакта миңа да мөрәҗәгать итүчеләр шактый булды, – ди Россия Дәүләт Думасы депутаты Айрат Фәррахов. – Киләсе ярты елдан гаиләдә кимендә бер бала булса, олы кеше айга кимендә ике яшәү минимумыннан азрак хезмәт хакы алса, ул балага төбәктәге яшәү минимумы күләмендә акча түләнәчәк. Уртача 11 мең сумнан санасак, ике яшәү минимумы – 22 мең сум. Ике кешелек гаиләнең кереме – 44 мең сум һәм гаиләдә яшь ярымнан өч яшькәчә бала да бар икән, яшәү минимумы буенча пособие түләнәчәк. Ул пособие өчен акча федераль казнадан күчәчәк. Аның өчен 2020 елга якынча 74 миллиард сум акча кирәк булыр, дип фаразлана.
Инвалид бала тәрбияләүче хезмәт яшендәге, әмма бала тәрбияләү сәбәпле эшләмәүче әти-әниләргә бирелүче пособие күләме дә 1 июльдән якынча ике тапкыр арта һәм ун мең сум булачак. Бу уңайдан редакциягә: “Аны алу өчен гариза тапшырасы дип сөйлиләр, шул сүз дөресме икән?” – дип шалтыратучылар да булды. Пенсия фондының Татарстандагы идарәсе идарәчесе урынбасары Асия Вәлиуллина әйтүенчә, аны рәсмиләштерү өчен, Пенсия фондына барып, гариза тапшыру кирәкми. Моңа кадәр эшләгән ата-ана, киләчәктә эштән китеп, инвалид бала тәрбияләүгә күчсә генә, ул хакта хәбәр итәргә һәм гариза язарга тиеш була.
Фәния Арсланова
АнонимКирәкми!Пионерияне кайтарырга кирәкме?
Загрузка ...
