Бүген Татарстан Президенты Рөстәм Миңнеханов Россия табигать ресурслары һәм экология министры урынбасары – Урман хуҗалыгы федераль агентлыгы җитәкчесе Сергей Аноприенко белән очрашты.
Очрашу Хөкүмәт йортында узды. Анда урман байлыкларыннан нәтиҗәле файдалану, урманнарны яңарту, урман хуҗалыкларының матди-техник базасын ныгыту, урман тармагы өчен кадрлар әзерләү мәсьәләләре каралды.
Очрашу барышында Рөстәм Миңнеханов Сергей Аноприенкога Татарстан Республикасы дәүләт бүләген – “ТАССР оештырылуга 100 ел” медален тапшырды.
Сүз уңаеннан, 2021 елда Татарстанда Татарстан Республикасы урман хуҗалыгы белән идарә итүнең тәүге дәүләт органы оештырылуга – 100 ел, шулай ук Лубян урман-техник көллияте оештырылуга да 100 ел тулуның билгеләп үтеләчәген искәртик.
Бүген Сергей Аноприенко “Агач утырту” табигатьне саклау акциясендә катнашачак. Акция Балык Бистәсе районы территориясендә үткәрелә.
