Бүген Татарстан Республикасы Хөкүмәте Йортында прокуратура хезмәткәрләренә Татарстан Республикасы дәүләт бүләкләре һәм ведомство бүләкләре тапшырылды. Бу хакта Президентның матбугат хезмәте хәбәр итте.
Тантанада Татарстан Республикасы Президенты Рөстәм Миңнеханов, Татарстан Республикасы Премьер-министры Алексей Песошин, Татарстан Республикасы Прокуроры Илдус Нәфыйков катнашты.
Видеоконференцэлемтә режимында узган чарада республиканың барлык муниципаль районнары да катнашты.
Сәламләү сүзендә Рөстәм Миңнеханов барысын да һөнәри бәйрәм – Россия Федерациясе Прокуратурасы хезмәткәрләре көне белән котлады.
«Прокуратура бер урында гына тормый, һаман үсүдә. Эшне камилләштерү буенча күрелә торган чаралар Прокурор күзәтчелегенең нәтиҗәлелегенә уңай йогынты ясый, — диде Рөстәм Миңнеханов. — Хокуклары республика Прокуратурасы тарафыннан якланган гражданнар саны арта бара. Узган 2020 ел безнең барыбыз өчен дә җиңел булмады. Җәмгыять моңарчы билгеле булмаган өндәүләр белән очрашты. Бу шартларда барлык идарә органнары өчен мөһим бурыч – эпидемиягә каршы көрәш һәм гражданнарның төп социаль-икътисадый хокукларын, җәмгыять һәм дәүләт мәнфәгатьләрен саклау булды».
Бу өлкәдә республика Прокуратурасы зур эш башкарды.
«2020 елда прокуратура хезмәткәрләре тарафыннан закон бозуның меңләгән очрагы тамырдан бетерелгән, җинаятьләр һәм хокук бозулар белән көрәшү эшчәнлегенә җайга салуга юнәлгән йогынты ясалган. Республика халкы тормышын тотрыксызландыруга юл куелмады, хезмәт базарында җитди проблемаларны булдырылмады, икътисад, бизнес, дәүләт һәм муниципаль органнарның нормаль эшләве тәэмин ителде», — дип ассызыклады Рөстәм Миңнеханов.
Рөстәм Миңнеханов прокуратура хезмәткәрләренә көч, сабырлык һәм бүгенге көндә аеруча актуаль булган нык сәламәтлек теләде.
Татарстан Республикасы Прокуроры Илдус Нәфыйков сәламләү сүзендә прокуратура хезмәткәрләренең закон сагында нык торуларын, гражданнарның хокукларын һәм ирекләрен яклавын билгеләп үтте. Ул хезмәттәшләренә хезмәтләре һәм көндәлек катлаулы эшләре өчен рәхмәт белдерде.
Соңыннан Прокуратураның алдынгы хезмәткәрләрен бүләкләү тантанасы булды.
