“Безне таладылар”. “Рубин” премьер-лигада калырга өметләнә

«Рубин»ның баш тренеры Леонид Слуцкий Казаннан китмәячәк. Кала, әмма командасының кайда уйнаячагы билгеле түгел: ФНЛга төшәрме, әллә премьер-лига калырга рөхсәт бирерләрме? Башкала клубының язмышын Мәскәүдә хәл итәчәкләр. Генераль директор Рөстәм Сайманов журналистларга клуб тарихындагы иң катлаулы вакыйгаларның нилектән килеп чыкканын аңлатырга тырышты һәм үзләрен «корбан» дип атады.

Татар юрап китерер. Узган шимбәдә «Рубин» тамашачысының курыканны чынга ашты. 2003 елдан бирле премьер-лигада чыгыш ясап, ике мәртәбә чемпион булып танылган, берничә ел дәвамында Европаны шаулаткан команда хәлиткеч матчта «Уфа»га оттырып, сезонны 15нче урында тәмамлады. Мондый уенны хәтта иң талантлы режиссерлар да уйлап чыгара алмас иде. Башта «Рубин» беренче булып туп кертте. Аннары көндәшләр исәпне тигезләде һәм төп вакытның соңгы минутында алга чыктылар. Инде барысы да бетте дигәндә, Сергей Иванов кунаклар капкасына пенальти билгеләде: Леонид Слуцкийның иң яратмаган хөкемдары аның командасына һич югы бер очко алу мөмкинлеге бирде. Әмма беренче таймда туп керткәч, кулына телефон алып, шатлыгын фотога төшерә башлаган Виталий Лисаковичка бәхет бу юлы арты белән борылды. Ул типкән туп капка баганасына бәрелеп, Казан командасының өметен юкка чыгарды.  

Очрашудан соң җанатар сүгенде, футболчылар гафу үтенде. Күз яше күрсәтүчеләр дә булды. Моннан өч ел элек «Рубин»ны коткару өчен чакырылып, беренчесендә бу эшне уңышлы башкарып, аннары җырга-моңга бирелгән, бертуктаусыз хөкемдарлар белән тарткалашкан, футбол кыры өчен җаваплы агрономнарны сүккән, язга чыккач чит ил уенчыларының китүеннән зарланып, кул астындагы уенчылардан өметен өзгән Леонид Слуцкий исә матбугат очрашуына ничек керде, шул килеш чыгып та китте. Ниләр булганны аңлатырга һәм ниләр көтеләсен сөйләргә журналистлар алдына дүшәмбе көнне клубның генераль директоры Рөстәм Сайманов чыкты.

Беренче итеп баш тренер турында сорадылар. Слуцкий калачак. Хәтта команда ФНЛда чыгыш ясаган очракта да Казандагы эшен дәвам итәчәк. «Ул – яхшы белгеч. Сезон нәтиҗәсен аның осталыгы белән генә бәйләү дөрес түгел. Бу очракта ул барысыннан да күбрәк зыян күрде, үзе корбанга әверелде», – диде генераль директор.

Рөстәм Сайманов бүгенге хәлләрнең төп сәбәбе дип чит ил уенчыларының кайтып китүен әйтә. Билгеле булганча, Европаның футбол түрәләре Россиядә чыгыш ясаучы уенчыларга гамәлдәге килешүне туктатып торырга рөхсәт бирде. Мондый мөмкинлектән файдаланып, Казан командасының 6 футболчысы китеп барды. «Безне таладылар», – ди Рөстәм Сайманов. Генераль директор әйтүенчә, Казан клубында очсызрак бәягә чит илдән футболчылар алып, соңрак аларны сатып, акча эшләргә хыялланганнар. Әмма Украинада мәгълүм хәлләр башлангач, барысы да пыран-заран килә. «Ул егетләр белән утырып сөйләштек. Акча түләнәсен, илдә тыныч буласын әйттем. Калырга ризалаштылар. Ә аннары барысын да ташлап кайтып киттеләр. Без бу вакыйгалардан иң зур зыян күргән клуб булдык», – диде ул.  

Әлегә исә күзләр Мәскәүгә төбәлгән. 24 майда анда Россия футбол берлеге башкарма комитеты утырышы уза. Әлеге җыелышта премьер-лигада чыгыш ясаучы командалар саны турында фикер алышу була. 16дан 18гә җиткерәләр икән, «Рубин»га тагын бер мөмкинлек бирәчәкләр. Инде юк икән, Казан командасына, кем әйтмешли, җиргә төшеп, барысын да яңабаштан башларга һәм иң көчлеләр сафында уйнау хокукын кабат яуларга туры киләчәк.

– Слуцкий ФНЛга әзер. Әле менә алдагы көнне генә төнгә кадәр алырга мөмкин булган уенчылар турында сөйләшеп утырдык. Премьер-лигада калырга өметләнәбез. Инде төшәбез икән, кабат кайтуны максат итеп куйдык, – диде Рөстәм Сайманов. – ФНЛда уйнау безнең өчен җинаятькә тиң. Шуңа күрә хушлашмыйбыз.