Кариев театрында премьералар. Уйнаталар да, куркыталар да

Наркотикларга бәйлелек турындагы драма, куркыныч әкият һәм нәниләр өчен әлифба-спектакль. Кариев театрында берьюлы өч премьерага багышланган матбугат очрашуы узды. Спектакльләр нәрсә турында? Премьералардан ни көтәргә? Сүзебез шул турыда булыр.

«12 адым» (12+)

«Бу хакта без, гадәттә, сөйләшергә яратмыйбыз, йә куркабыз. Шулай да, тәвәккәлләп, сөйләшергә булдык». Бу юллар – «12 адым» спектакленең аннотациясеннән. Кариев театры 25–26 гыйнварда наркотикларның кеше тормышына һәм шәхесенә җимергеч йогынтысы турындагы документаль спектакль тәкъдим итәчәк. Иҗат төркеменә килгәндә, драманы – Булат Минкин, спектакль өчен музыканы Йосыф Бикчәнтәев иҗат иткән. Режиссеры – Әминә Миндияр.

– «12 адым» – социаль юнәлештәге спектакль. Әминәне чакырган вакытта, бурычны болайрак куйдык: спектакльдә беренче урында сәнгати яссылык түгел, ә документальлек, социаль эчтәлек булырга тиеш. Аны килеп караган үсмерләр наркотиклар белән бәйләнгән егет-кызларның язмышын, наркотикларга бәйлелек кайда һәм нинди хәлгә илтәсен һәм бу проблемадан нинди чыгу юллары барлыгын күрәчәк, – диде беренче премьера турында театрның директоры Луиза Шарова.

Спектакль эчкечелек һәм наркотикларга бәйлелекне дәвалауга юнәлдерелгән «12 адым» программасына нигезләнгән.

«12 адым» программасын узган гасырның 30 нчы елларында үзе дә эчкечелектән тилмергән Билл Уилсон исемле кеше төзегән. Башта ул эчкечеләрне дәвалау өчен кулланылса, бераздан аның ярдәмендә наркоманнарны да дәвалый башлаганнар.

– Гадәттә, наркотиклар турындагы фильмнарны бик матур итеп, романтик рухта төшерәләр. Ә безнең спектакль тамашачыларда наркотикларга карата җирәнү уятыр дип өметләнәбез. Яшьләр бит наркотикларның начар икәнен белә, әмма ни өчен начар икәнен аңлап җиткермиләр. «12 адым» – калыплашкан фикерләрсез, хөкем итүләрсез ачыктан-ачык сөйләшү, – диде спектакльнең режиссеры.

 «Гөлчәчәк» (12+)

«Кич белән, театрның иң соңгы хезмәткәре кайтып китеп, ишекләр бикләнгәч, монда куркыныч әкият башлана». Бу юллар – «Гөлчәчәк» хоррор-әкиятенең аннотациясеннән. Гади итеп әйткәндә, театрның яшь актеры Булат Гатауллин, үзен тәүге тапкыр режиссер буларак күрсәтеп, куркыныч әкият куячак. Дөрес, «Гөлчәчәк»не «Һөнәр» яшь режиссура фестивале кысасында күрсәттеләр инде. 9 февральдә аның зур премьерасы булачак.

– Бу спектакль белән тулы бер цикл башлап җибәрәсебез килә. Халык әкиятләре, милли шигърият, хатлар, мемуарларны балалар һәм үсмерләргә аңлаешлы формада җиткерә ала торган кыска гына спектакльләр, алар белән бергә фикер алышу яки лекция форматындагы очрашулар оештырырга телибез. Бу очрашуларны «Мәтрүшкә party» дип атадык, – диде Луиза Шарова.

Спектакльне театрның фойесында күрсәтәчәкләр.

– «Гөлчәчәк»не балалар да, үсмерләр дә, тәнкыйтьчеләр дә килеп карарга өлгерде. Һәммәсенә дә ошады. Балаларның эмоцияләре, реакцияләре бик кызык булды. Таң калып карады алар. Ә бу – иң мөһиме, – диде Убырлыны уйнаучы Алсу Шакирова.

«Әлифба: Хәрефләр дөньясында» (2+)

«Әлифба – дөньяны танып белән генә башлаган сабыйның аңына юл салучы ул». Бу юллар – «Әлифба: Хәрефләр дөньясында» спектакленең аннотациясеннән. Монысы инде – иң кечкенәләр өчен уен формасындагы спектакль. Режиссеры – Лилия Әхмәтҗанова.

Бераз гына «спойлер»: әлифбадагы хәрефләр, без татарча көннән-көн азрак сөйләшкәнгә үпкәләп, качып киткәннәр икән… Спектакльдә актерлар, балалар һәм аларның әти-әниләрне, шуларны табып алып, кире үз урыннарына кайтарачак. Бу хикмәтле хәрефләр дөньясын беренче булып күрергә теләүчеләрне 22 февральдә – спектакльнең премьерасында көтәләр.

– Бу спектакль татар мохите турында. Әлеге мохиткә балалар да «чума» алсын өчен, әлифбаны кулланырга булдык. Спектакль уен формасында барачак. Артистлар балалардан әлифбадагы һәр хәрефкә туры килә торган сүзләр сораячак. Кыскасы, нәни тамашачылар процессның эчендә «кайнаячак», – дип сөйләде спектакльнең режиссеры.

Спектакль өчен декорацияләрне күчмә форматта да эшләп булырлык итеп ясаганнар. Шуңа күрә киләчәктә аны балалар бакчаларына, мәктәпләргә дә алып барырга ниятлиләр.

Лилия Гыймазова