Дәүләт Советында, КПРФ фракциясе инициативасы белән узган «түгәрәк өстәл» утырышында Казандагы «Кояшлы шәһәр» торак комплексындагы проблемалар турында фикер алыштылар. Киңәшмә эшендә КПРФ фракциясе җитәкчесе, Дәүләт Советы Президиумы әгъзасы Хафиз Миргалимов, Социаль сәясәт комитеты рәисе Светлана Захарова, парламент депутаты Фадбир Сафин, республика министрлыклары һәм ведомстволары, Казан Башкарма комитеты вәкилләре, микрорайонда яшәүчеләрнең инициатив төркем әгъзалары катнашты.
2021 елның февралендә парламентта КПРФ фракциясе «Кояшлы шәһәр» торак комплексы мисалында территорияләрне комплекслы төзекләндерү турында» резолюция кабул итте.
– Шул ук елның көзендә парламент депутатлары микрорайонга барып, халыкны борчыган проблемаларны үзләре күреп кайтты, – диде Хафих Миргалимов. – Күп катлы торак йортлар төзүнең гадәттән тыш тыгызлыгы, мәктәпләр, балалар бакчалары, поликлиникалар һәм хастаханәләр, автопарковкалар, балалар мәйданчыклары, парклар һәм яшел территорияләр, урам утлары, юллар булмау иң кискен иде. Кызганыч, проблемаларның күбесе һаман да шул хәлдә кала, резолюциянең 19 пунктыннан берсе генә үтәлгән – терапия һәм педиатрия бүлекләре булган поликлиника ачылган.
Микрорайонда яшәүчеләрнең инициатив төркеме вәкилләре әйтүенчә, хәзерге вакытта «Кояшлы шәһәр»дә чагыштырмача ирекле калган территорияләрдә тагын ике күпкатлы йортны төзергә җыеналар. Әлеге участокларда балалар өчен мәктәптән тыш белем бирү үзәге һәм офис үзәге булачак, дип вәгъдә иткән булганнар, әмма бүген бу җирләрнең статусы торак биналар төзелеше өчен яңадан рәсмиләштерелгән икән. Шул ук вакытта 20 мең халкы булган микрорайонда социаль инфраструктура объектларына гадәттән тыш кытлык күзәтелә.
Парламентның Социаль сәясәт комитеты рәисе Светлана Захарова, микрорайонда яшәүчеләрнең күп санлы проблемаларына борчылу белдереп, барлык яклар белән бергә аларны этаплап хәл итү өчен чаралар комплексын эшләргә тәкъдим итте. «Җаваплы затларны һәм муниципаль структураларны, өстенлекле объектларны билгеләп әзерләнгән эзлекле план кирәк», – диде ул.
Төзелеш, архитектура һәм торак-коммуналь хуҗалык министрлыгы, Хезмәт, халыкны эш белән тәэмин итү һәм социаль яклау министрлыгы, Җир һәм мөлкәт мөнәсәбәтләре министрлыгы, Сәламәтлек саклау министрлыгы, Мәгариф һәм фән министрлыгы, Яшьләр министрлыгы, Спорт министрлыгы, Казан шәһәре Башкарма комитеты, Казан ЮХИДИ идарәсе, Роспотребнадзор һәм Дәүләт төзелеш күзәтчелеге җитәкчеләре һәм җаваплы хезмәткәрләре микрорайон проблемаларын хәл итүгә үз карашларын тәкъдим итте. Алар, микрорайонда яшәүчеләрнең шикаятьләренең һәм дәгъваларының нигезле булуын танып, «түгәрәк өстәл» утырышында катнашучыларны үз юнәлешләре буенча эшне дәвам итәселәрен әйтте.
Дәүләт Советы депутаты Фадбир Сафин, «Кояшлы шәһәр» торак комплексы проблемалары буенча фикер алышуда актив һәм кызыксынып катнашулары өчен рәхмәт белдереп, муниципаль һәм күзәтчелек органнарына мөрәҗәгатьләрне конкретрак төзү кирәклегенә игътибар юнәлтте. «Барлык юнәлешләр өчен дә җаваплы структуралар бар, мәктәпләр, балалар бакчалары, ял үзәкләре, спорт заллары, керү юллары, яшел зоналар — болар барысы да теше яки бу министрлык, идарә карамагында», — дип билгеләп үтте ул.
КПРФ фракциясе җитәкчесе Хафиз Миргалимов, түгәрәк өстәлгә йомгак ясап, депутатларның киләчәктә дә «Кояшлы шәһәр» торак комплексы проблемаларын хәл итү юлларын эзләүдә актив ярдәм итәчәген билгеләп үтте.
