Татарстанның «Ак барс» командасы өчен җан атучыларның урамында да, ниһаять, бәйрәм! Хоккей клубы Көнчыгыш конференциясенең беренчелегенә менде. Сөенми хәл юк. Сезон башындагы уен белән хәзергесен чагыштырып та булмый. Җанатарлар команданың нәтиҗәле уйный башлавын тренердан да күрә.
8 яшьлек «Ак барс» җанатары Арабелла Вафинаның тормышы тимераяк һәм боз белән тыгыз бәйләнгән. Фигуралы шуу белән мавыга кыз. Хоккейга да мөкиббән. «Ак барс» матчларын да кызыксынып карый ул. Әнисе Альбина да кызының кызыксынуларына каршы килми, куәтләп кенә тора. Казанның хоккей командасына карата фикерләрен белештек без аларның.
– Хәзер «Ак барс» без күрергә теләгән команда! Ә хикмәт – тренерда, – ди алар. – Әйтәләр бит: үз остазыңны табарга һәм бердәм команда булырга кирәк. Зиннәтулла Билалетдинов белән безнең клуб моңа ирешә алды. Аларның үз-үзләренә ышанычы артты. Һәр тренерның үз методикасы бар. Әмма ул барысына да туры килмәскә мөмкин. Хоккейда индивидуальлеккә урын юк. Берәүне дә гаеплисе килми, әмма Билалетдинов белән егетләребез илһамланып китте һәм тагын да тырышыбрак уйный башлады.
Тренерыбыз бик якты кеше. Аннан җылылык, җиңү һәм бердәмлек энергиясе килә. Аның сүзләре генә дә ни тора бит! Зиннәтулла Хәйдәр улы: «Намуслы хезмәт кенә җиңүгә илтә!» ди. Бу сүзләр хоккейчылар өчен генә түгел, фигуралы шуу белән мавыгучылар өчен дә девизга әйләнде. Без «Ак барс»ка һәрвакыт ышандык һәм ышанудан туктамаячакбыз! Зиннәтулла Билалетдинов кебек тренер башка юк! Ул бөек шәхес.
Кызчыкның яраткан уенчысы Данис Зарипов икән. «Аның туган көне дә 25 (Данис Зарипов 25 саны астында уйный. – Ред.) февраль бит. «Любэ» төркеменең «Заря» җыры яңгыраганда туды ул! Бала тапкан вакытта палатада шул җыр яңгырап торды», – дип искә ала Арабелланың әнисе.
Чулпан Гарифуллина
