70 яшьлек студент Илфат Әскәров: «Адәм баласы рәхәткә чыдый алмый бит ул»

Колга башына менеп гармун уйнаучы 70 яшьлек Илфат абыйны газетабызда бер язган идек инде. Ул чакта бер шаккатырса, бу юлы янә гаҗәпләндерде. Узган ел журналистика бүлегенә кереп, быел беренче курсны тәмамлаган. Әле, җитмәсә, массаж ясаучы булыр өчен махсус курсларга язылган. Хыялы  – чәчтараш, бизәндерүче һөнәрләренә өйрәнү.

– Россия ислам университетында читтән торып журналистика бүлегендә белем алам. Менә редакциядә хисап эшләренә кул куйдыртып йөрим, – диде Арча районында яшәүче Илфат абый, хәлен белеп шалтыраткач. – “Мөхәммәдия” мәдрәсәсен тәмамлагач, югары белем аласы килде. Вузда уку теләге 4-5 ел ук уянган иде. Мин бит мәкаләләр, шигырьләр, җырлар да язам. Башта акча ягы бераз куркытты, аннан ковид килеп чыкты. Ниһаять, 69 яшьтә тәвәкәлләдем.

– Картаеп беткәч, нигә укып йөрисез димиләрме соң? – дип сорадык аннан.

– Әйтә шул. Югары белемем юк иде, бәлкем, дәрәҗәле эшләрдә эшләрмен, дип шаяртам. Биюче булгач, ник шул юлдан гына китмәдең, дип сораучылар да бар. Адәм баласы рәхәткә чыдый алмый бит ул. Михнәт күрсә, көчле була. Мин менә шуны эзләп йөрүчечеләрдән инде, – ди студент.

70 яшьлек Илфат абый заманадан калышмаска тырыша. Бер белмәгән интернетның серләренә төшенеп килә. Хәзер менә социаль челтәрдән аралашырга өйрәнә. “Үзем генә ерып чыга торган түгел. Яшьләр аны су урынына эчә. Сабакташларым булыша. Тырышканны күрәләр, укытучылар да начар билге куймый. Хатыным да хуплап тора. Шулай булмаса, шушы яшьтә мондый адымга барыр идем мени?”, – ди ул.

Заманында Алабуга мәдәни-агарту училищесын тәмамлаган ул. Соңгы вакытта Арча һәм Биектау районында балаларны биергә өйрәткән. Быел Теләче укучыларын баянга өйрәтергә нияте бар. “Музыкаль әсәрләр өйрәнә башладым. Мин бит өч бармак белән генә уйный торган баянчы түгел, дипломым бар”, – ди Илфат абый.

Тагын бер шөгыле бар әле аның. Инде 50 елдан артык колгага менү белән мавыга ул. Үзе белән гармунын да алып менә әле. Ә менеп җиткәч, уйнап җибәрә. Аңа маймыл дип кушамат та такканнар.

– Казанның Дәрвишләр бистәсендә соңгы ике ел рәттән беренче урын алган идем. Әмма бүләген бирмәделәр. Аягыма сагыз сөрткән идем. Быел барыбер осталыгымны күрсәтәчәкмен. Миңа юкка гына “маймылы” кушаматы такмадылар бит, – ди Илфат абый.

Үзе яшерми: 70тә яшьтә егет булып йөрү җиңел түгел. Шуңа күрә ул, күнегүләр ясап, чаңгыларда шуып үзен тәртиптә тотарга тырыша. Иҗатны, тормышны ярату исә яхшы кәеф өсти. Сокланырлык бит!

Сәрия Мифтахова