33 кеше Россия Президентын сайлауда катнашырга ниятләнүен белдергән инде. Үзәк сайлау комиссиясе рәисе урынбасары Николай Булаев шулай дип белдергән. Бу хакта “РИА Новости” яза.
“Барлыгы 33 кандидат”, – дигән Булаев, 2024 елда Президент сайлавында катнашу өчен күпме кандидат дәгъва кыла, дигән сорауны җаваплап.
Исегезгә төшерәбез: Россия Президентын сайлау 2024 елның 15-17 мартында үткәреләчәк. КПРФ Россия Президентын сайлауга кандидат итеп Дәүләт Думасы депутаты Николай Харитоновны, ЛДПР – партия лидеры Леонид Слуцкийны, “Гражданлык инициативасы” партиясе – депутат Борис Надеждинны, “Новые люди”, “Партия Роста” белән берләшеп, Дәүләт Думасы вице-спикеры Владислав Даванковны тәкъдим иткән. “Справедливая Россия – За правду” съездында исә бүгенге дәүләт башлыгы Владимир Путин кандидатурасы бертавыштан хупланган. Бүгенге Президент, илбашын сайлауга кандидат сыйфатында теркәлү өчен, Үзәк сайлау комиссиясенә документларын беренчеләрдән булып тапшырган.
