Татарстанда кыяр, кәбестә һәм тавык йомыркасы кыйммәтләнгән

9-16 декабрь аралыгында кибетләрдә яшелчәләрнең бер өлеше кыйммәтләнгән. Шулай ук бәя арту тавык йомыркасы һәм тавык итенә дә кагылган.

Азык-төлек бәяләренең артуы Татарстанстат мәгълүматларыннан күренә. Аерым алганда, бер килограмм кыяр – 193,73 сумнан 217,42 сумга, ә помидор 214,20 сумнан 227,06 сумга арткан. Кәбестә бәясе – 6,80 процентка, ягъни 37,87 сумнан 40,45 сумга кыйммәтләнгән. Тавык йомыркасы һәм тавык ите 2,69 һәм 2,28 процентка арткан. Телгә алган продуктлардан тыш, дуңгыз ите, туңдырылган балык, атланмай, маргарин һәм каймак бәяләре дә 1 процентка кыйммәтләнеп өлгергән.

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!