Онколог үпкәне яман шештән сакларга ярдәм итүче ризыкларны атаган

Үпкә яман шешен профилактикалау атналыгы кысаларында Пенза районының К.А. Карагызов исемендәге хастаханәсе онкологы Екатерина Долгова үпкә тукымасы өчен файдалы ризыкларны санап үткән. Бу хакта «Пенза-Пресс» мәгълүмат агентлыгы төбәк Сәламәтлек саклау министрлыгының матбугат хезмәтенә сылтама белән хәбәр итә.

Табиб үпкәне саклауда брокколи, төсле кәбестә, брюссель һәм башлы кәбестәнең мөһим роль уйнавын билгеләп үткән. Бу яшелчәләрдә глюкозинолатлар бар. Алар ашкайнату барышында сульфорафанга әйләнә. Әлеге матдә сәламәт тукымаларга зыян китермичә, яман шеш күзәнәкләрен юк итәргә һәм аларның үсешен туктатырга сәләтле.

Антиоксидантлар да зур әһәмияткә ия. Төтен яки пычранган һава сулаганда үпкәдә ирекле радикаллар — күзәнәкләрнең ДНКсына зыян китерүче агрессив молекулалар барлыкка килә. Антиоксидантлар аларны зарарсызландыра.

Мәсәлән, кишергә, кабакка, бататка һәм күрәгәгә кызгылт-сары төс бирүче бета-каротин, тикшеренүләр күрсәткәнчә, онкология куркынычын киметергә мөмкин. Помидор, карбыз һәм алсу грейпфрут составындагы ликопин исә җылылык белән эшкәртелгәннән соң яхшырак үзләштерелә. Цитрус җимешләрендә, кивида һәм татлы борычта булган С витамины кан тамырлары стеналарын ныгыта һәм тәмәке тарту аркасында барлыкка килгән оксидлашу стрессыннан күзәнәкләрне саклый.

Суган һәм сарымсак составындагы күкертле кушылмалар ялкынсынуга каршы тәэсир итә, организмнан токсиннарны чыгарырга ярдәм итә. Бу продуктларны даими куллану үпкә һәм ашказаны яман шеше куркынычы кимү белән бәйле.

Суны җитәрлек күләмдә эчү дә мөһим. Бронхларның лайлалы тышчасы керфекчекле эпителий белән капланган. Аның керфекчекләре гел хәрәкәтләнеп, тузанны, корымны һәм микробларны сулыш юлларыннан чыгара. Организмда су җитмәгәндә лайла куера, керфекчекләр бер-берсенә ябыша, ә токсиннар үпкәдә кала. Какырыкны сыекландыру һәм сулыш юлларының үз-үзен чистарту сәләтен саклау өчен көненә 1,5–2 литр чиста су эчәргә киңәш ителә.

Яшел чәй дә файдалы булырга мөмкин. Аның составындагы катехиннар — үпкә яман шеше күзәнәкләренең үсешен акрынайту сәләте тикшеренүләрдә өйрәнелгән антиоксидантлар.

БЕЗНЕҢ МАКС КАНАЛЫНА ЯЗЫЛЫГЫЗ!