Дәүләт хезмәтләре порталында мәктәп укучыларының әти-әниләре шәхси кабинетларында август аенда бер тапкыр 10000 сум алуга әзер гаризалар пәйда булган. Бу хакта Россия Пенсия фондының Татарстан буенча бүлеге матбугат хезмәте хәбәр итә.
Тутырылган гаризалар ата-аналарга 11 июльдән килә башлаган. Аларны тутыру өчен фондның үткән елларда 16 яшькә кадәрге балаларга түләүләр барышында җыелган мәгълүматларыннан файдаланылган. «Ата-аналарның төп бурычы – барлык мәгълүматларның дөреслеген тикшерү. Кемнәрнеңдер фамилиясе яки телефон номеры алышынган булырга мөмкин. Шуңа башта – шәхси профильнең, аннан соң гаризаның дөреслеген тикшерергә кирәк. Акча җибәрү өчен күрсәтелгән счетны да тикшерү-барлау мөһим. Төп шарты – счет гариза бирүченеке булырга тиеш, ә түләү системасының ниндилеге мөһим түгел», – ди бүлекнең матбугат хезмәте башлыгы Альбина Никандрова. Акчаны август аенда күчерә башлыйлар.
Исегезгә төшерәбез: 10 мең сум күләмендәге акча бер тапкыр 6–18 яшькә кадәрге балаларның әти-әниләренә һәм, физик мөмкинлекләре чикләнгән булу сәбәпле, мәктәптә укуларын дәвам итүче 18–23 яшьлек инвалидларга бирелә. Август аенда Татарстанда барлыгы 468 мең бала 10 мең сум алачак.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез