Рөстәм Миңнеханов Катар Гражданнар оборонасы буенча Югары Советы Рәисе урынбасары белән очрашты

Очрашу «Казан Экспо»да «Комплекслы куркынычсызлык-2026» салоны кысаларында узды.

Рөстәм Миңнеханов ассызыклаганча, Россия белән Катар арасындагы мөнәсәбәтләр сәүдә-икътисадый, мәдәни-гуманитар һәм фәнни-техник өлкәләрдә үсә бара. 

"Сезнең ил - Россиянең Якын Көнчыгыш төбәгендә мөһим һәм ышанычлы партнеры. Татарстан үз дәрәҗәсендә Россия-Катар мөнәсәбәтләрен ныгытуга ярдәм итәргә тырыша», - диде республика Рәисе Куркынычсызлыкны тәэмин итү һәм халыкны яклау мәсьәләләренә аерым игътибар бирелде. 

Рөстәм Миңнеханов Катар ягына салонда катнашулары өчен рәхмәт белдерде, чараның Россия Гадәттән тыш хәлләр министрлыгы системасын үстерү өчен стратегик әһәмиятен билгеләп үтте. "Салон илнең төп тармак мәйданчыкларының берсе булып тора. Монда янгын сүндерү-коткару бүлекчәләре һәм катнаш тармаклар эшчәнлегендә алга таба кулланыла торган хәл ителешләр күрсәтелә», - дип ассызыклады ул.

Рөстәм Миңнеханов шулай ук хәбәр иткәнчә, бүген Татарстанда янгын сүндерүчеләрне һәм коткаручыларны әзерләү буенча укыту-тренировка комплексы ачылды. Яңа объект белгечләрнең һөнәри күнекмәләрен камилләштерергә ярдәм итәчәк. Татарстан Рәисе Катар делегациясен яңа укыту-тренировка полигонына чакырды. 

Үз чиратында Мөхәммәд Әл Суләйти республика җитәкчелегенә кунакчыллык күрсәткәннәре өчен рәхмәт белдерде. Ул куркынычсызлыкны тәэмин итү өлкәсендә хезмәттәшлекне тирәнәйтү белән кызыксынуын белдерде һәм «Комплекслы куркынычсызлык» салоны кебек халыкара чараларны уздыруның мөһимлеген билгеләп үтте.

БЕЗНЕҢ МАКС КАНАЛЫНА ЯЗЫЛЫГЫЗ!