Роспотребнадзор эпидемиология фәнни-тикшеренү институтының молекуляр диагностика үзәгенең лаборатория медицинасы бүлеге җитәкчесе Елена Тиванова өйдә коронавирус инфекциясенә тестны үткәрү бәясен атады. «Россия 24» эфирында ул мондый анализның 1250 сумга төшәчәген билгеләп үтте. Әлеге суммага медицина персоналының өйгә килеп хезмәт күрсәтү бәясе кермәгән.
— Анализның бәясе 1250 сум, бу суммага пациентның яшәү урынына карап, медицина персоналын чакырту бәясе дә өстәлә, — дип хәбәр итте Тиванова.
Анализны табиб күрсәтмәсеннән башка гына да тапшырырга була. Тест нәтиҗәсе 1-2 көн дәвамында билгеле була. Нәтиҗәләр почтага җибәрелә.
