Эссе көндә бүлмәне ничек итеп тиз генә суытырга мөмкин булуын аңлатканнар

Эссе көндә аеруча кояшлы якта урнашкан бүлмәдә сулышны кысарлык дәрәҗәдә бөркү була. Бүлмәне кул астындагы әйберләр белән ничек суытырга?

Эсселеккә каршы көрәшүдә төп ярдәмчебез – ул да булса су. Парга әйләнгәндә, җылылыкны “йотып”, һава температурасын чама белән 3-5 градуска төшерә ул.
- Тәрәзәгә юеш пәрдә элеп кую. Ачык тәрәзәгә юеш пәрдә яки җәймә элеп куегыз. Аның аша узганда, һава бераз суыначак.
- Бөркегеч куллану. Бүлмәгә (әмма мебельгә түгел) бөркегечтән су бөркегез. Суга бераз бөтнекнең эфир маен өстәргә мөмкин: ул “салкынча”лыкны көчәйтеп җибәрәчәк.
- Җилләткеч алдына боз кую. Пластик шешәдәге суны катырып, җилләткеч алдына куегыз. Үзенә күрә бер “кондиционер” килеп чыга.
- Идән юу. Сап-салкын су белән юыгыз. Боз өстәргә дә мөмкин. Аеруча кафель яки линолеум идәнне шулай юу бүлмә температурасын төшерә.
- Юеш келәмчек. Һава йөри торган урыннарга – ишек, тәрәзә янына салкын суда чылатылган келәмчек яки сөлге салыгыз.
Үзеңне “суыту”
- Дөрес итеп эчү. Җылы яшел чәй эчү яхшырак: тирләтеп, организмны суытуга ярдәм итә. Салкын су исә, киресенчә, эчке җылыны арттыруга гына китерә (чөнки организм аны җылытуга энергия тота). Татлы эчемлекләр һәм каптагы сокларны да кулланмау хәерле – алар организмга авырлык китерә.
- Салкынча компресс кую. Бозны сөлгегә төреп, муенга, беләзеккә яки пульс әйбәт сизелә торган башка урыннарга 1-2 минутка куеп торыгыз. Суынуыгызны шундук сизәчәксез.

Сүз уңаеннан, хәзерге вакытта Татарстанда “Һәр кешегә сәламәтлек” төбәк проекты гамәлгә ашырыла.

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!