Октябрьдә – чәчүгә: агроном киңәшләре

Яшелчә уңышын киләсе язда ук җыю өчен, кайберләрен октябрь азагында чәчеп калдырырга кирәк. Болай эшләгәндә, яшел тәмләткечләрме, башкасымы апрель азагы- май башында чәчкәндәгедән 2–3 атнага алданрак өлгерәчәк. Көзге чәчү серләре белән агроном Наил Сәмигуллин уртаклашты.

Нәрсә чәчәсе

Укроп. Орлык, ком белән катнаштырып, буразналар ясамыйча гына түтәлгә сибелә. Кулай сортлары: «фейерверк», «геркулес», «удалец», «нежность», «редут», «грибовский».

Петрушка. Орлык туфракка күп дигәндә 1,5 см тирәнлеккә күмелә. Эре яфраклы сортларын сайлап алу яхшырак. Болар – «кучерявец», «бордовикская», «бриз», «зеленый хрусталь» кебек сортлар.

Кинза. 1–1,5 см тирәнлеккә чәчелә. Сортлары: «шико», «янтарь», «алексеевский 247», «тайга», «стимул», «бородинский».

Кишер. Орлыкка җылырак булсын өчен, 15–20 см биеклектәге түтәлләргә чәчелә. Буразналарның тирәнлеге – 2,5–3 см. Суыкка иң чыдам сортлары: «витаминная», «московская зимняя», «каротин супер», «любимая мамочка», «крестьянка».

Чөгендер. Кояш төшә торган җиләсрәк урын сайлап алына. Орлык туфракка 4 см тирәнлеккә күмелә. Кышка чәчеп калдыру өчен иң әйбәт сортлары – «египетская», «сибирская плоская», «капитан», «шоколадка», «знатная хозяйка».

Нәрсәләргә игътибар итәсе

* Тамыразыкларны һава температурасы +2...+4 чикләрендә тирбәлгән чорда чәчәләр. Укроп, петрушка кебек яшел тәмләткечләрне – җиңелчә генә төнге кыраулардан соң беренче берничә көндә.

* Кышка чәчеп калдырылганы начаррак тишелгәнлектән, орлык тиешледән 1,5–2 тапкыр күбрәк алына.

* Бары тик коры орлык кына кулланалар. Юеше салкын туфракта өшергә мөмкин.

* Мөмкинлеккә карап, көзге культуралар түтәлен төньяктан көньякка таба урнаштырырга тырышалар. Бу очракта, беренчедән, кар тизрәк эреячәк. Икенчедән, үсентеләр көннең күбрәк өлешендә кояш җылысында утырачак.

* Чәчкәннән соң түтәлгә су сипмиләр. Юкса орлык өши.

* Түтәлне алданрак әзерләп куялар. 1–2 атна кала ашлама (компост, тирес – 1 кв. м мәйданга 5–7 кг исәбеннән) кертеп, түтәл казыйлар. Чәчү алдыннан гына буразналар ясыйлар.

* Чәчкәннән соң түтәлне пычкы чүбе, кипкән яфрак, компост яки торф белән каплап куялар.

Кышка чәчеп калдырылган яшелчә һәм яшел тәмләткечләрнең уңышы күпкә тәмлерәк һәм сусылрак була.

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!