Казан парклары чараларга бай була

Программада зур шәһәр пикнигы, шәһәр бергәлекләреннән мастер-класслар, «Парк Квизы», диджейлардан чыгышлар көтелә. Быел җәй көне «Черек күл» паркында – Мәдәни клуб, ә Акчарлак күлендә Сәламәтлек клубы ачылачак. Бүген җәмәгать киңлекләрендәге җәйге программа белән «эшлекле дүшәмбе» киңәшмәсендә Казанның Парклар һәм скверлар дирекциясе җитәкчесе Айгөл Латыйпова таныштырды.

Айгөл Латыйпова сөйләвенчә, җәй көне җәмәгать киңлекләрендә орнитологик сәфәрләр, шахмат турнирлары, балалар барахолкалары, ачык һавада тренировкалар һәм башка чаралар узачак. «Яңа сезонда парклар саф һавада йөрү урыны гына түгел, ә даими очрашулар, шәхси тарихлар һәм уртак гадәтләр ноктасы да булачак. Быел җәй көне киңлекләрне кызыксыну буенча җанлы клублар челтәренә әйләндерергә телибез. Анда һәркем тормышка карашы буенча «үзенекен» таба алачак», – дип билгеләп үтте җитәкче.

– Казан халкы паркларда ял итүнең яңа форматларын бәяләрләр дип өметләнәбез. Планлаштырылган чаралар нәтиҗәсендә һәр парк үз йөзен булдырачак. Биредә шәһәр халкы балалары яки дуслары белән бергә яңа тәэсирләр алып, ниндидер яңалыкка өйрәнерләр дип ышанабыз. Паркларның төрле юнәлештә эш алып баруына, чараларга бай булуына шатланырга гына кала, – дип билгеләп үтте Казан мэры Илсур Метшин.

Айгөл Латыйпова сүзләренчә, бу җәйдә шәһәр халкын кызыксынулары буенча яңа клубларда фикердәшләр һәм дуслар табарга чакыралар. «Черек күл» паркында лекцияләр циклы белән мәдәни клуб ачылачак. Күргәзмәләр кураторлары, музей белгечләре һәм мәдәният тикшеренүчеләре гади тел белән заманча экспозицияләрнең ничек төзелүе, күргәзмә проектларының ничек барлыкка килүе һәм ни өчен музейлар бүген әйберләр белән түгел, ә кешеләр белән ешрак эшләве турында сөйләячәк. Акчарлаклар күлендә Сәламәтлек клубы барлыкка киләчәк. Биредә табиблар һәм фармацевтлар лекцияләре, медиклар күзәтүе астында спорт дәресләре оештырыла. Шәһәрнең биш паркында шахмат турнирлары кысасында яңа юнәлеш – лото буенча турнирлар ачылыр дип көтелә. Яшькә карамастан, уенга һәркем кушыла ала, ди оештыручылар. Балаларның җәен дә киң кырлы итәргә җыеналар. «Елмай» балалар паркында хор һәм яшүсмерләр театр лабораторияләре, концертлар, кино күрсәтүләр, фестивальләр һәм Казансу елгасына караган кичәләр үткәрәчәкләр.

Яшелчә үстерергә яратучыларны да онытмаганнар. Быел да иҗтимагый яшелчә бакчалары проекты шәһәрнең актив халкын янә берләштермәкче. Яшелчә бакчасы беренче тапкыр Серов урамындагы бульварда ачылачак. Шулай ук бакчачылык белән «Салават Күпере» торак комплексы янындагы паркта, Горки-Әмәт урманында һәм Урицкий паркында шөгыльләнеп булачак. Шуны да әйтергә кирәк: быел дүртенче тапкыр «шәһәр бакчачысы мәктәбе» узачак. Дәресләр биш паркны үз эченә ала.

Эш эзләүче яшүсмерләргә дә яхшы яңалык бар. Дирекция җитәкчесе билгеләп үтүенчә, паркларда 14–18 яшьлек яшүсмерләр өчен түләүле җәйге стажировка оештырыла. Алар «Елмай» һәм «Черек күл» паркларында, Горки-Әмәт урманында һәм Серов урамындагы бульварда эшли торган булачак.

Сүз уңаеннан, хәзерге вакытта Татарстанда “Туристлык һәм кунакчыллык” илкүләм проекты гамәлгә ашырыла.

БЕЗНЕҢ МАКС КАНАЛЫНА ЯЗЫЛЫГЫЗ!