Очрашу 20 нче Россия венчур форумы кысаларында узды. Очрашуда Татарстан Фәннәр академиясе президенты Рифкать Миңнеханов, Татарстан Республикасы Инвестиция-венчур фонды директоры Дамир Галиев, югары уку йортлары ректорлары, стартап-проектлар эшләүчеләр катнашты.
Рөстәм Миңнеханов белдергәнчә, республика-сәнәгать ягыннан алга киткән, икътисады үз-үзен тәэмин итә торган төбәк. 2025 ел йомгаклары буенча Татарстанда төяп җибәрелгән продукция күләме 6 трлн сумга җиткән, ә республика территориясендә формалаштырыла торган барлык төр салымнар суммасы 1,8 трлн сум тәшкил итә. Татарстан Рәисе ассызыклаганча, икътисадны тотрыклы үстерү югары квалификацияле кадрлардан һәм фәнни базадан башка мөмкин түгел.
Рөстәм Миңнеханов белгечләр әзерләүнең төп этабы буларак мәктәп белеменең мөһимлеген билгеләп үтте. Ул хәбәр иткәнчә, республикада берничә юнәлешле проект гамәлгә ашырыла, шул исәптән «Физматалгарыш» һәм «Физхималгарыш», шулай ук индустриаль партнерлар җәлеп ителә торган инженерлык мәктәпләре белән системалы эш алып барыла. «Безнең бурыч – талантлы яшьләрне республикада калдыру һәм башка төбәкләрдән иң яхшы белгечләрне җәлеп итү өчен барлык шартларны тудыру», – диде Татарстан Рәисе.
Моннан тыш, Рөстәм Миңнеханов Россия венчур форумының динамик үсешен билгеләп үтте: катнашучылар саны һәм илләр саны арта, ә махсуслаштырылган күргәзмәдә тәкъдим ителгән проектлар тармак компанияләрендә зур кызыксыну уята. Ул бу юнәлештә эш дәвам итәчәк, дип белдерде.
Россия Мәгариф һәм фән министрлыгы башлыгы Валерий Фальков үз чиратында инновацион һәм технологик проектларга иртә стадияләрдә ярдәм итүнең мөһимлеген, шулай ук аларны алга таба гамәлгә ашыруда ярдәм итүне ассызыклады. Ул билгеләп үткәнчә, перспектив проектлар нәкъ менә Россия территориясендә гамәлгә ашырылырга тиеш, шуңа бәйле рәвештә талантлы эшләүчеләр илдә калырга теләсеннәр өчен шартлар тудыру мөһим.
Очрашуда илкүләм инновацион сәясәт үсеше перспективалары, фәнни-техник һәм инновацион эшчәнлеккә ярдәм итү инструментларын һәм механизмнарын камилләштерү, тикшеренүләр һәм эшләнмәләр өлкәсенең инвестицион җәлеп итүчәнлеген арттыру турында фикер алыштылар.
Университет технологик эшкуарлыгы платформасы бүген миллионга якын кешене, 519 югары уку йортын һәм Россиянең 87 төбәген берләштерә, дип билгеләп үтелде.
БЕЗНЕҢ МАКС КАНАЛЫНА ЯЗЫЛЫГЫЗ!
Фикер өстәү
Фикерегез