Җир йөзенә ябырылган бик көчле магнит давылы 30 сәгать чамасы дәвам итә икән инде. Мондый көннәрдә күпләр үзләрен начар хис итә: хроник йөрәк-кан тамырлары авырулары көчәя, кан басымы күтәрелә, йөрәк кага. Кәефе һава торышына бәйле кешеләр гадәттә мондый көннәрдә башы авырту, кәефсезләнү, йокы качу, хәлсезлек кебек билгеләрне аеруча нык сизәргә мөмкин.
Табиб-невролог Екатерина Демьяновская “Российская газета” хәбәрчесе белән әңгәмәсендә билгеләп үткәнчә, йөрәк-кан тамырлары авыруларыннан, гипертониядән интегүчеләргә, шулай ук өлкәннәр һәм йөкле хатын-кызларга магнит давылы чорында аеруча игътибарлы булырга кирәк.
Белгеч бу көннәрдә организмга көч китермәскә: тәүлегенә кимендә 7 сәгать йокларга, күбрәк ял итәргә киңәш иткән. Чиста су күбрәк эчәргә: ул кан басымын көйләргә, баш авыртуын киметергә ярдәм итә. Ә менә кофеиннан баш тарту хәерле: чөнки йөрәк һәм кан тамырларына төшә торган йөкне тагын да көчәйтә.
Табиб организмда авыр эшкәртелә торган ризыклар кулланмаска, күбрәк яшелчә, шулай ук магний һәм калийга бай продуктлар – банан, яшел тәмләткечләр, чикләвек ашарга киңәш иткән.
“Гипертониядән интегүчеләргә артериаль кан басымын даими үлчәп торырга һәм, кирәк булганда, табиб кушканча, даруларны үзгәртергә кирәк”, – дип өстәгән белгеч.
Сүз уңаеннан, хәзерге вакытта Татарстанда “Һәр кешегә сәламәтлек” төбәк проекты гамәлгә ашырыла.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез