"Тынлык сәгате" турында юрист Гөлнара Беглова: "Белмәү – җаваплылыктан коткармый"

 «Ялилов һәм Партнерлар» юридик фирмасы юристы Гөлнара Беглова «Төнлә гражданнарның тынычлыгын һәм тынлыкны саклау турында» республика законын бозучыларның җаваплылыкка тартылуы хакында әйтте.

– «Төнлә гражданнарның тынычлыгын һәм тынлыкны саклау турында» республика законын бозучылар административ җаваплылыкка тартыла. Әлеге статья кисәтүне дә, административ штраф салуны да күздә тота. Әйтик, гражданнарга 500дән 1000 сумга кадәр штраф яный. Бу хәл бер ел эчендә тагын кабатланса, штраф күләме 1500-2000 сум булырга мөмкин. Гамәлдәге закон нигезендә, җавапка тарту өчен гражданнарның субъектив фикере нигез булып тора. Димәк, һәркем тынлыкны бозуны үз хисләреннән чыгып бәяли. Минемчә, бу дөрес түгел. Зыян күргән як законны явыз ният белән кулланырга да мөмкин.

Әлбәттә, көндезге «тыныч сәгать» кечкенә балалары булган һәм өлкән яшьтәге кешеләр өчен бик кирәк. Әмма моны кертсәң, явыз ниятләрне бетерү өчен, минемчә, рөхсәт ителгән тавышның чикләрен һәм аны үлчәү принципларын беркетергә кирәк. Юкса аны кабул иткән очракта, әлеге закон тагын да күбрәк бәхәсләр китереп чыгарачак.

Төнге вакыт эш көннәрендә 22.00 сәгатьтән 6.00 сәгатькә кадәр, ял һәм эшләми торган бәйрәм көннәрендә 22.00 сәгатьтән 9.00 сәгатькә кадәр.

Төнлә гражданнарга түбәндәгеләр тыела:

1) төнге вакытта гражданнарның тынычлыгын һәм тынлыкны бозуга китергән очракта телевизор, радиоприемник, магнитофон һәм башка тавыш чыгара торган, шул исәптән транспорт чараларында, сәүдә объектларында, җәмәгать туклануы объектларында һәм күңел ачу үзәкләрендә урнаштырылган җайланмаларны куллану;

2) сак сигнализациясен, шул исәптән транспорт чараларында билгеләнгән тавыш сигналларын вакытында сүндермәү, йә төнлә гражданнарның тынычлыгын бозуга китергән төзек булмаган сак сигнализациясен куллану;

3) пиротехник чараларны куллану;

4) музыкаль инструментларда уйнау, сызгыру, җырлау, шулай ук төнлә гражданнарның тынычлыгын бозган тавышлар чыгару;

5) ремонт, төзелеш, төяү-бушату эшләре башкару.

Шулай ук гражданнарның тынычлыгын тәэмин итә торган объектлар да билгеләнгән. Хәзерге вакытта аларга түбәндәгеләр керә:

1) күпфатирлы һәм шәхси торак йортлар, шул исәптән аларда урнашкан гомуми файдаланудагы урыннар;

2) белем бирү оешмалары, балалар, картлар һәм инвалидлар өчен интернат-йортлар, интернат бүлмәләре булган хастаханәләр, диспансерлар һәм башка медицина оешмалары, шифаханә, ял йортлары, пансионатлар, оешмалар;

3) кунакханәләр һәм тулай торак бүлмәләре;

4) йорт яны территорияләре;

5) кемпинг, мотельләр, ял базалары территорияләре;

6) бакчачылык территорияләре.

Сәрия Мифтахова

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!