Татарстанда ялларда 14 кешенең гомере янгында өзелгән. 20 кешене коткарып кала алганнар. Татарстан коткаручылары никадәр генә кисәтеп, киңәшләр бирсә дә, куркыныч очраклар кимеми.
Биектау районының Алан-Бәксәр җирлегендә ике көн рәттән янгын чыккан. Шөкер, үлүчеләр юк. 6 гыйнварда өлкән яшьтәге ир-ат төшке аштан соң ял итәргә яткан. Бәхеткә, янгын хакында хәбәр бирүче җиһаз тавыш чыгарган. Ир-ат аны үзе дә ишеткән, әмма урыннан тора алмаган. Тавышны ишетеп күршесе кергән. Шулай итеп, ир-атны коткарып калганнар. Йорт-җир янып беткән. 7 гыйнварда исә, янгынга күңел ачу сәбәпче булган.
– Янгын кышка, җәйгә карап тормый. Тормыш бит инде бу. Бер нишләп булмый. Уты да чыга, – ди Алан-Бәксәр авыл җирлеге башлыгы Зөһрә Гарифуллина. – Җирлек янгынга каршы торуга әзер. Гидрантлар бар, су җитәрлек. Әмма бер теләк: кешеләр саграк булсын иде. Бер уйлап карасаң, бар да үзебездән тора бит.
Югары Ослан районында ике кеше һәлак булган. Соңрак аларның бертуганнар икәнлеге ачыклана. Йортларына ут капкач, кызлары әнисен өйдән алып чыга, аннары энесен эзләргә кереп китә. Тик берсе дә кире чыга алмый. Чаллыда исә, ир белән хатын янып үлә. Көпә-көндез була ул хәл.
Ялларда уттан гына түгел, сөрем газы белән дә агуланучылар булды. 9 гыйнвар көнне ике бала белән әниләре хастаханәгә эләккән. Россия Гадәттән тыш хәлләр министрлыгының Татарстандагы баш идарәсенең матбугат үзәге хәбәр иткәнчә, Яңа ел бәйрәмнәрендә республикада барлыгы 111 янгын очрагы теркәлгән. 14 кеше һәлак булган, 5 кешенең сәламәтлегенә зыян килгән. 20 кешене уттан коткарганнар.
Ут күбрәк шәхси йортларда чыккан. Коткаручылар бу көннәрдә янгынның төп сәбәбен тәмәке тарту дип атый. Шулай ук исерек булу, ут белән саксыз эшләү, җылыткычларның төзек булмавы, электр җиһазларын дөрес итеп кулланмау да янгын китереп чыгарган.
Һава торышы аркасында юлларда да куркыныч хәлләр булды бу көннәрдә. 10 гыйнвар көнне М7 трассасында берьюлы 15 машина бәрелешкән. Дәүләт автоинспекциясе мәгълүматларына караганда, 1–10 гыйнварда Татарстан юлларында 86 юл һәлакәте теркәлгән, 1 кеше һәлак булган, 117 кешенең сәламәтлегенә зыян килгән.
Янгын килеп чыкмасын өчен нишләргә?
– Исерткеч эчемлекләр кулланмагыз. Фатир эчендә, аеруча урын өстендә тәмәке тартмаска кирәк;
– Балаларны өйдә ялгызын гына калдырмагыз. Аларга һәрдаим янын хакында сөйләп торыгыз. Ут чыкса, качмаска, йорттан-фатирдан чыгып котылырга кушыгыз;
– Төзек булмаган җиһазлар кулланмагыз;
– Җиһазларны токка тоташтырып калдырмагыз;
– Газ плитәсе ачып өй җылытмагыз!
Гөлгенә ШИҺАПОВА
Телеграмда безнең каналга кушылыгыз: https://t.me/vatantat