Әнвәр Нургалиевның хәлләрен белештек.
Туган урыны: Башкортостанның Әлшәй районы, Әврүз-Тамак авылында туган
Туган көне: 28 гыйнвар 1974 ел (47 яшь)
Йолдызнамә буенча: Сукояр
Гаилә хәле: өйләнгән (хатыны Ирина, улы – Рафаэль, кызы – Илина)
— Тормышыгыздагы иң бәхетле көн?
Әти-әни исән-сау булган көннәрнең барысы да кадерле һәм бәхетле… Бөтенебез җыелып шау-гөр килеп эшләгән, бәйрәм иткән, ял иткән чакларны искә алам – чын-чынлап бәхетле булу өчен кешегә бик аз кирәк бит.
— Иң зур уңышыгыз нәрсә?
Гаиләм. Таянычым, терәгем алар. Алардан да кадерле һәм якын кешеләрем юк. Мин аларга чиксез рәхмәтле.
— Туган көн — һәр кешенең яңа елы башлана дигән сүз. Яңа елга нинди план, максатлар куясыз?
Минем, гомумән, тормышка карашым үзгәрде. Үземне башкача күзаллыйм хәзер. Әнвәр Нургалиев үзгәрәчәк. Яңа җырлар иҗат итәрбез, башка стильдәрәк булырмын бәлки. Һәм үземә күбрәк игелек кылу, кешеләргә ярдәм итү дигән максат куйдым.
— Бүген туган көнен уздыручыларга теләкләрегез?
— Тазалык телим. Күңел тынычлыгы. Һәрберсе теләгән изге теләкләренә ирешсен иде.
Лиана Мәрданова
