Хуҗабикәләрнең күбесе токмач пешкән суны түгә. Ә бит аннан файдаланырга мөмкин.
*Коймак камырына өстибез. Сөткә бераз гына шул суны кушсаң, коймак күпереп, бик йомшак һәм тәмле булып пешәчәк.
* Фасоль яки борчакны җебетәбез. Болай эшләгәндә, кузаклылар үзенчәлекле бер тәмле тәм сеңдереп, тизрәк пешәчәк.
* Гөлләргә сибәбез. Ләкин су кайнар һәм тозлы булмаска тиеш! Сыеклыктагы крахмал гөлләрне тукландыра.
* Савыт-саба юу өчен кулланабыз. Майлы таба яки башка савытны токмач «шулпасы»на салып, бераз тотабыз. Крахмал майны бик яхшы эретә.
