Февраль ахыры булуга карамастан, Чаллыда яшәүче Фәридә Байбикованың биләмәсендә һәрвакыт яз. 20 квадрат метрлы фермасында ул микрояшеллек үстерү белән шөгыльләнә. «Кешеләргә файда, үземә тынычлык китерә». Яраткан шөгыле турында бакчачы әнә шулай ди.
Әлеге эш белән шөгыльләнә башларга кирәклеге турында Фәридәгә сәламәтлеге «хәбәр сала».
– 2020 – пандемия елы иде ул, – дип искә ала Фәридә. – Берничә тапкыр коронавирус белән авырып алгач, яшь булуга карамастан, хәлсезлектән интегә башладым. Сөякләрем сызлый, чәчем коела, тырнакларым да сына иде. Анализлар организмга витаминнар җитмәвен күрсәтте. Күптөрле табибларга мөрәҗәгать итсәм дә, дарулар эчсәм дә, файдасы булмады. Ә остеопатка баргач, ул миңа күп итеп яшел тәмләткеч ашарга кушты. Тик минем очракта укроп һәм петрушка гына ярдәм итми иде. Яшел тәмләткечләрнең һәм микрояшеллекнең файдасы турында күптәннән белә идем, тик аңа кадәр үзем утыртып карау турында башыма да кереп карамады. Әйләнә-тирәдәгеләрнең барысы да вируслар йоктырып авырый башлагач исә, әлеге эшкә тотынырга вакыт җитүен аңладым.
Шулай итеп Фәридә яшел үсемлекләрнең кечкенә үсентеләрен башта тәрәзә төпләрендә үстерә, соңрак ире балконнарын җылыта һәм кирәкле барлык шартларны тудыра. Ә инде 2022 елдан ул ферма арендалап эшли башлаган.
– Барысы да тиз һәм җайлы гына килеп чыкты дип әйтеп булмый. Иң элек тәҗрибәле сити-фермерлардан курслар алдым. Ләкин уңыш хаталар һәм кат-кат эшләп караулар белән генә килде. Эшнең уңышлы баруында сыйфатлы орлыкның роле зур. Акрынлап намуслы эшмәкәрләр белән дә элемтәләр ныгыды. Ирем дә зур ярдәмчем булды. Кәефем төшкән вакытларда ул: «Син бит инде бу эшне башладың, алга таба да шөгыльләнәсең килә. Хаталарыңны тап та алга бар», – дип кабатлап торды, – ди Фәридә Байбикова.
Аның әйтүенчә, микрояшеллек аз калорияле, витаминнарга, антиоксидантларга һәм магний, бакыр, калий, цинк, тимер кебек микроэлементларга бай. Өстәвенә, үсемлекләрнең кечкенә үсентеләрен ашау иммунитетка һәм ашкайнату системасына уңай тәэсир итә һәм холестерин дәрәҗәсен дә төшерә. Микрояшеллекне даими рәвештә куллану организмны токсиннардан арындыра һәм күзәнәкләрнең актив яңаруына ярдәм итә.
– Үсемлекләрдә ике яфрак үсү стадиясендә бөтен витаминнар һәм файдалы микроэлементлар туплана. Мәсәлән, 2–3 кашык брокколи үсентесендә бер кәбестә күчәнендәге кадәр витамин бар, – ди ул.
Баштагы вакытларда әлеге файдалы үсентеләрне гаиләсе, туганнары, танышлары өчен генә үстерсә, хәзер аның клиентлары шактый. Күпләрне үзе дә яшеллек үстерергә өйрәткән. Шуңа күрә андыйлар хәзер үз тәрәзә төпләрендә дә файдалы витаминнар үстерә.
– Сатып алучыларымның барысы да – гап-гади кешеләр. Ниндидер зур оешмалар белән эшләмим, чөнки микрояшеллекне озак саклап булмый. Аны, өлгергәч, берничә көн эчендә үк ашап бетерергә кирәк. Ә клиентларга мин аларны үсеп утырган хәлдә китерәм. Шунысы куандыра: хәзер кешеләр сәламәтлегенә игътибар итә, файдалы һәм сыйфатлы ризык ашарга тырыша, – ди Фәридә.
Микрояшеллекне ел дәвамында үстерсә дә, Фәридә барлык эшләрне үзе башкара, ярдәмчеләре юк. Моннан тыш, фермада Витграсс согы ясар өчен бодай үсентеләрен дә үстерә икән. Бодай үсентесе кышын 10–11 көндә өлгерсә, җәен 8–10 көн дә җитә. Шулай итеп, айга ике тапкыр уңыш ала.
– Әлеге сокның файдасын белүчеләр аннан өзелгәннәре юк. Бик файдалы. Аны бер айдан башлап курс белән эчәргә мөмкин. Сокны катырып, суыткычта берничә ай сакларга да мөмкин, – ди ул.
Күренеп һәм сизелеп тора: Фәридә Байбикова эшен бик яратып башкара.
– Мин яшеллекне бик яратып үстерәм, – ди үзе дә. – Ул матур, тәмле һәм файдалы. Эше дә күңелгә ятышлы, тынычландыра. Хезмәтемдә иң нык яратканы – үсемлекләр белән аралашу, фермадагы тынычлык һәм рәхәтлек. Биредә кошлар сайрый, үсемлекләр өчен уңайлы климат булдырылган. Һәм, әлбәттә, кешеләрнең сәламәтлегенә файда китерә алуым белән дә бәхетлемен. Үземнең дә бодай үсентесе согын эчә һәм микрояшеллекне ашый башлагач, өч ай узганнан соң, анализларым яхшырды.
Зөһрә Садыйкова
АнонимЭлфизэ, молодец!«Безгә килеп күрегез!»: тавыш бирү этабы башлана (өченче бишлек)
Загрузка ...
