Чебиләр сатып алуга тотылган чыгымнар өлешен каплауга гаризалар кабул итә

Татарстан Республикасы Авыл хуҗалыгы һәм азык-төлек министрлыгы чебиләр сатып алуга тотылган чыгымнар өлешен каплауга гаризалар кабул итә.

Шәхси ярдәмче хуҗалык тотучы гражданнарга 2025 елның 1 апреленнән 1 июленә кадәр яшь кош-корт (каз, үрдәк, күркә, бройлер чебиләре) сатып алуга тотылган чыгымнарының бер өлешен каплауга субсидия бирелә. Моның өчен 2 июльдән 16 июльгә кадәр гариза бирергә кирәк. Бу турыда министрлык сайтында язылган.

Субсидия түбәндәге шартлар үтәлгәндә бирелә:

чебиләр авыл хуҗалыгы кошлары үрчетү белән шөгыльләнүче һәм Татарстан Республикасы территориясендә теркәлгән кошчылык хуҗалыкларыннан сатып алынган булырга тиеш;
сатып алына торган чебиләрнең яше - 30 көннән дә зуррак булмаска тиеш;
бер шәхси ярдәмче хуҗалыкка алына торган чебиләр саны 50дән 100 башка кадәр булырга тиеш;
сатып алына торган чебиләр партиясенә ветеринария документлары җыелмасы булырга тиеш.
Субсидияләр күләме түбәндәгечә карала:

бер күркә чебиенә - 200 сум;
бер казга - 200 сум;
бер үрдәккә - 120 сум;
бер бройлер чебиенә - 100 сум.
Документлар «Минем субсидияләр» («Мои субсидии») системасы аша электрон рәвештә кабул ителә.

Сүз уңаеннан, хәзерге вакытта Татарстанда “Яшәү өчен инфраструктура” илкүләм проекты гамәлгә ашырыла.

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!