Татарстанда җылы һәм коры көннәр тәмамлана. Республикага яңгырлар килә, көчле җил һәм температураның әкренләп климатик нормага кадәр төшүе көтелә. Бу хакта республиканың Гидрометеорология үзәге хәбәр итә.
Шимбә – 11 октябрьдә республикада антициклон йогынтысында җылы һава саклана. Явым-төшем булмаячак. Көндезге сәгатьләрдә термометрның терекөмеш баганасы +13...+19 градуска кадәр күтәреләчәк. Төнлә +2...+8 градус.
Якшәмбе – 12 октябрьдә һава торышы үзгәрә: җылы һәм коры һавалы антициклонны Атлантиканың яңгырлы, салкын һава агымы кысрыклый башлаячак. Шуңа күрә республиканың көнбатыш районнарында аз гына яңгыр, секундына 15 метрга кадәр тизлектә җил булачак. Көндез һава температурасы +8...+13, төнлә +3...+8 градус чикләрендә тирбәләчәк.
Гидрометеоүзәкнең башлангыч фаразына караганда, киләсе атна башында – 13–14 октябрьдә яңгырлы, болытлы һава көтелә. Көндез +6...+11, төнлә +1...+6. Тәүлеклек уртача температура нормага якынлашачак.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез