Россиядә Коксаки вирусы көчәйгән. Әмма ул зур эпидемиягә әйләнмәячәк. Артыгын борчылырга урын юк. Вирусолог, медицина фәннәре докторы, профессор, Гамалея исемендәге Эпидемиология һәм микробиология фәнни-тикшеренү үзәге белгече Анатолий Альтштейн “RT” хәбәрчесенә шул хакта сөйләп үткән.
Профессор аңлатып үткәнчә, Коксаки вирусы – 29 төрдән торган чир төркеме. Аның сүзләренә караганда, кешелек бу инфекция белән таныш.
“Безгә аны Төркиядән яки башка җирдән керткәннәр дип сөйләү – дөрес түгел, – дип билгеләп үткән Альтштейн. – Көз, яз айларында, кайвакыт җәен дә инфекция көчәеп киткәли, аеруча – балалар арасында. Хәзер дә шундый хәл күзәтелә. Инфекция көчәю, кагыйдә буларак, зур эпидемиягә әйләнми. Мондый чирнең үлем-китемгә китерү куркынычы бик аз. Шуңа күрә артык борчылырга урын юк”.
Вирусолог сүзләренә караганда, вирусның таралуына юл куймас өчен кулларны яхшылап юарга, инфекция көчәеп китсә – балалар бакчалары эшен туктатып торырга кирәк. “Битлек бу чирдән котылуга әлләни ярдәм итә алмый”, – дип сөйләп үткән ул.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез