Казан бистәләрендә юлларны киң колачлы төзекләндерү күздә тотыла. Авиатөзелеш, Вахитов, Идел буе, Киров һәм Мәскәү районнарында барлыгы 19 чакрымнан артыграк озынлыктагы юл өлешләрен яңартуга 1,469 млрд сумнан артыграк акча биреләчәк. Дәүләт сатып алулар сайтында бу җәһәттән тендерлар турында мәгълүматлар урнаштырылган.
Шулай итеп, Северный, Грабарский, Коры Река, Кадышево, Борисоглебское, Дружба, Брикетный, Савиново, Калуга, Первомайский, Отары, Восточный, Старые Горки, Тынычлык, Кояшлы, Салмачы, Левченко, Краснооктябрьский һәм Залесный бистәләрендәге юлларны ремонтлау каралган.
Төзекләндерергә тиешле урамнар юллары исемлеге дистәләрчә атамадан тора. Заявкалар 2 июньгә кадәр кабул ителә. Подрядчылар 4 июньдә билгеләнәчәк. Эшләр быел 20 декабрьгә кадәр төгәлләнергә тиеш.
Проект “Яшәү өчен инфораструктура” илкүләм (милли) проект кысасында гамәлгә ашырыла. Аның буенча комиссияне Татарстан Рәисе Рөстәм Миңнеханов җитәкли.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез