18 ноябрь 2025 Яңалыклар

Казанда «Камал театры» тукталышы «Иске Татар бистәсе»нә әйләнә

Казан үзәгендә «Галиәсгар Камал театры» җәмәгать транспорты тукталышы атамасы 19 ноябрьдә «Иске Татар бистәсе»нә алыштырылачак. Бу хакта «Татар-информ» Татарстан башкаласы мэриясенең матбугат хезмәте мәгълүматларына таянып яза.

Театрның Һади Такташ урамындагы яңа бинага күчерелүенә бәйле бу. Шәһәрнең Транспорт буенча комитетында билгеләп үтелгәнчә, яңа атама тарихи район янәшәсендәге тукталышның урнашу урынына туры килә. Шул ук вакытта республикада яшәүчеләргә дә, туристларга да Иске Татар бистәсен табуны җиңеләйтәчәк.

Тукталыш атамасы үзгәрү 18 автобус маршрутына – 1, 2, 5, 6, 10, 10а, 23, 30, 31, 35, 35а, 47, 54, 56, 71, 72, 74, 91 нче автобуслар һәм 3, 5, 7 троллейбусларга кагыла. Транпорт предприятиеләре электрон һәм стационар таблоларны яңартуга керешкән дә инде.

Мэриядә басым ясап әйтелгәнчә, үзгәрешләр җәмәгать тарнспорты расписаниесендә чагылыш тапмаячак.

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!