Татарстан Рәисе Рөстәм Миңнеханов 2025 елның беренче алты аенда Татарстанның берләштерелгән бюджеты үтәлеше йомгаклары буенча финанс, казначылык һәм салым органнарының республика киңәшмәсен уздырды. Хөкүмәт Йортында узган чарада Татарстан Премьер-министры Алексей Песошин катнашты.
Рөстәм Миңнеханов билгеләп үткәнчә, беренче яртыеллыкта республиканың берләштерелгән бюджетына керемнәр күләме 326,4 млрд сум тәшкил итә, шулардан салым һәм салым булмаган керемнәр – 276,4 млрд сум. Үз керемнәрен җыю буенча еллык план 54,5%ка үтәлгән.
«Шул ук вакытта әлеге күрсәткечләр тынычланыр өчен сәбәп түгел. Быел бюджет үтәлеше бик киеренке. Узган ел белән чагыштырганда табышка салым буенча керемнәр кими. Предприятиеләр фаразына караганда, әлеге тискәре динамика үсәчәк. Тармак министрлыкларына бюджетка түләүләрне тәэмин итүче предприятиеләрнең җитештерү күрсәткечләрен анализлау буенча эшне активлаштырырга, киләчәктә салым керемнәре буенча аларның фаразларын карарга кирәк», – дип ассызыклады Татарстан Рәисе.
Ул җитештерүчеләргә кооперациячел элемтәләр урнаштырырга, гамәлдәге ярдәм чараларын кулланырга, яңа ярдәм чаралары буенча федераль дәрәҗәдә тәкъдимнәр кертергә өндәде. Икътисад министрлыгы һәм Финанс министрлыгы бу эшне җайга салырга тиеш.
Моннан тыш, Рөстәм Миңнеханов республика Финанс министрлыгына агымдагы шартларда беренче чираттагы һәм социаль йөкләмәләрнең абсолют үтәлешен, катгый финанс-бюджет дисциплинасын тәэмин итәргә кушты.
Татарстан Рәисе билгеләп үткәнчә, федераль үзәк ярдәмендә 2030 елга кадәр чорга яңа илкүләм проектлар кысаларында чаралар гамәлгә ашырыла. Быел аларны гамәлгә ашыруга 42,9 млрд сум каралган, шул исәптән 23,4 млрд сум федераль акчалар. 456 объект төзелеше һәм ремонты тәэмин ителәчәк.
«Федераль үзәк белән килешүләрдә салынган барлык параметрлар да тулы күләмдә ирешелергә тиеш. Шулай ук агымдагы елда проектларыбызга өстәмә рәвештә нинди акчалар алуыбызны даими күзәтеп тору мөһим», – диде Рөстәм Миңнеханов.
Хәзерге вакытта федераль дәрәҗәдә 2026 елга һәм план чорына федераль бюджетны формалаштыру буенча эш башланды. Республика Рәисе ассызыклаганча, бюджетның керем өлешен киеренке үтәүне исәпкә алып, федераль финанслашу механизмнарын тулы күләмдә файдаланырга кирәк: «Барлык министрлыкларга да безнең өстенлекле чараларны федераль дәүләт программаларына һәм илкүләм проектларга кертүне тәэмин итәргә кирәк».
Татарстан Рәисе билгеләп үткәнчә, ел саен халыкның тормыш сыйфатын яхшыртуга юнәлдерелгән республика программаларына шактый акча кертелә. Быел шундый 48 программа гамәлдә.
Моннан тыш, киләсе елдан республика районнарында боз ареналары төзү буенча яңа республика программасын гамәлгә ашыру планлаштырыла. Башлыкларга мөрәҗәгать итеп, Татарстан Рәисе һәр объектны сыйфатлы төзү һәм нәтиҗәле эксплуатацияләү - аларның шәхси җаваплылыгы булуына басым ясады.
Бюджетны тулыландыру өчен мөһим резерв дип Рөстәм Миңнеханов салым бурычын атады, ул 1 июльгә 11,7 млрд сум тәшкил итә. «Аны кыскарту буенча чараларны дәвам итәргә кирәк – бу мәсьәлә даими рәвештә игътибар үзәгендә булырга тиеш», – диде Татарстан Рәисе.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез