Рөстәм Миңнеханов эш сәфәре белән Берләшкән Гарәп Әмирлегендә

Татарстан Республикасы Рәисе Рөстәм Миңнеханов кичә Берләшкән Гарәп Әмирлегенә эш сәфәренә килде, анда ул бүген башкаласы Абу-Дабида IDEX-2025 халыкара оборона күргәзмәсендә катнашырга планлаштыра.

IDEX халыкара корал һәм хәрби техника күргәзмәсе (International Defence Exhibition) ике елга бер тапкыр Абу-Дабида уздырыла һәм дөньяда иң танылган корал күргәзмәләренең берсе булып тора. Күргәзмә үз диварларына заказ бирүчеләрне һәм хәрби корал, хәрби техника, сак һәм иминлек системалары җитештерүчеләрне җыя. Потенциаль сатып алучылар һәм заказ бирүчеләр биредә ату коралының һәм башка төр коралларның яңа үрнәкләре белән таныша ала.

2023 елда узган күргәзмәгә 132 меңнән артык кеше килгән, анда дөньяның 65 иленнән 1 меңнән артык компания катнашкан. Күргәзмәләр барышында 8,8 млрд АКШ долларыннан артык суммага контрактлар имзаланган иде.

Россия Федерациясе IDEX-2025 халыкара оборона күргәзмәсендә традицион катнашучы булып тора. Россия делегациясен беренче вице-премьер Денис Мантуров җитәкли һәм 2 мең кв. метрдан артык мәйданда илебез экспозициясенең төп оештыручысы - «Рособоронэкспорт» АҖ, анда үз продукциясен «Россия вертолетлары» холдингы, «Ростех» дәүләт корпорациясе, «Алмаз-Антей» концерны, «Высокоточные комплексы" фәнни-җитештерү берләшмәсе» АҖ, «Технодинамика» АҖ һәм башкалар тәкъдим итә. Традиция буенча катнашучылар һәм килүчеләр арасында «Калашников» концерны продукциясе стенды зур кызыксыну уята.

Россия беренче тапкыр чит илдә яңартылган кыяфәттә Т-90МС «Прорыв» танкын, дроннарны юк итү өчен яңа идарә ителә торган ракеталар белән «Панцирь-СМД-Е» ПВО комплексын, барражирлаучы сугыш кирәк-яракларының һәм танкка каршы ракета комплексларының яңа модификацияләрен, шулай ук ату коралының яңа үрнәкләрен күрсәтер дип көтелә. Күргәзмәдә янгынга каршы Ка-32А11М вертолетының яңа модификацияләре, санитар һәм полиция вариантларында ике «Ансат» һәм Ми-38 вертолеты тәкъдим ителәчәк.

Татарстан Республикасы предприятиеләре күп тапкырлар IDEX күргәзмәсендә катнашты, анда төрле самолетлар һәм вертолетлар, йөк һәм бронялы автомобильләр, граждан һәм хәрби кораблар, оптик җайланмалар һәм башка хәрби продукция тәкъдим ителде.