Мәдәният өлкәсендә югары идарә мәктәбе – мәдәният, сәнгать һәм иҗат өлкәсендә югары кадрлар идарә резервын үстерү программасы. Проект 2024 елдан РФ Мәдәният министрлыгы тарафыннан Россия Президенты Администрациясе белән берлектә гамәлгә ашырыла. Өченче агым программасы җиде модульне үз эченә ала, шул исәптән онлайн-форматта. Өченче агымның бишенче модуле Казанда 27 октябрьдән 1 ноябрьгә кадәр уза.
Рөстәм Миңнеханов проектта катнашучыларны сәламләде һәм Мәдәният өлкәсендә югары идарә мәктәбе программасы төбәкләр арасында тәҗрибә һәм файдалы гамәлиятләр алмашу өчен нәтиҗәле мәйданчык булачагына ышаныч белдерде. Ул Россия Мәдәният министры Ольга Любимовага программаның бер модулен Татарстанда уздыру турындагы карары өчен рәхмәт белдерде.
Рөстәм Миңнеханов ассызыклаганча, бүген республикада 175 милләт вәкиле дус һәм тату яши. «Бездә бу халыкларның тәңгәллеген саклау өчен барлык шартлар да тудырылган. Без мәдәнияткә, гореф-гадәтләргә, туган телләргә сак карыйбыз, милли бәйрәмнәрне бергәләп билгеләп үтәбез», – диде республика Рәисе.
Ул хәбәр иткәнчә, республика территориясендә ЮНЕСКО Бөтендөнья мирасының 4 объекты урнашкан. Рөстәм Миңнеханов билгеләп үткәнчә, Россия һәм Татарстанның ЮНЕСКО белән хезмәттәшлеген ныгытуга Татарстанның беренче Президенты, республиканың Дәүләт Киңәшчесе Минтимер Шәймиев зур өлеш кертте.
Шулай ук Рөстәм Миңнеханов халыкара хезмәттәшлек темасына да кагылды. «Без мөселман дәүләтләре белән хезмәттәшлекне актив үстерәбез. "Россия - Ислам дөньясы" стратегик караш төркеме нәтиҗәле эшли, мин аны Россия Президенты кушуы буенча җитәклим. Быел Казан Ислам дөньясының мәдәни башкаласы статусын йөртә», – диде Татарстан Рәисе.
Рөстәм Миңнеханов программада катнашкан махсус хәрби операциядә катнашучыларны аерым сәламләде. «Сезнең тәҗрибәгез безнең төбәкләрнең киләчәге һәм яшьләрне патриотик тәрбияләү өчен бик мөһим. Татарстанда МХОдә катнашучыларга һәм аларның гаилә әгъзаларына ярдәм итү мәсьәләләренә аерым игътибар бирелә», – дип өстәде республика Рәисе.
Әңгәмә барышында Рөстәм Миңнеханов традицион халык-сәнгать һөнәрләренә ярдәм чаралары, шул исәптән Уникаль осталык үзәге мисалында республикада тарихи һәм архитектура мирасын саклау, яшьләрнең иҗади потенциалын гамәлгә ашыру өчен шартлар тудыру турында сөйләде.
Мәдәният өлкәсендә югары идарә мәктәбе программасының өченче агымы 2026 елның язында башланган. Анда илнең 36 төбәгеннән, шулай ук Абхазия Республикасыннан 86 кеше катнашкан. Болар – төбәкләрнең гамәлдәге мәдәният министрлары һәм мәдәният, сәнгать һәм иҗади индустрияләр өлкәсендәге төрле институтлар җитәкчеләре. Программада катнашучылар составына мәдәният өлкәсендә эшләүче махсус хәрби операциянең 17 ветераны кергән.
Татарстанга визитлары кысаларында программада катнашучылар мәдәнияттә, дәүләт секторында һәм бизнеста алдынгы карарларны куллану буенча республика тәҗрибәсен өйрәнәләр, инновацион алымнарны гамәлгә кертүнең уңышлы тәҗрибәләрен карыйлар.
БЕЗНЕҢ МАКС КАНАЛЫНА ЯЗЫЛЫГЫЗ!
Фикер өстәү
Фикерегез