Рөстәм Миңнеханов Марат Камболов белән очрашты

Рөстәм Миңнеханов белән бергә Марат Камболов Казан Кремленең күзәтү мәйданчыгында булды, анда шәһәр манзарасын карады.

Рөстәм Миңнеханов Марат Камболовка Казанга килүе һәм Татарстан белән хезмәттәшлек итүе өчен рәхмәт белдерде. "Россия һәм Көньяк Осетия арасындагы мөнәсәбәтләр аеруча дустанә. Инвестицион хезмәттәшлек программалары гамәлгә ашырыла. Сәяси, оборона, сәүдә-икътисади, гуманитар һәм мәдәни өлкәләрдә үзара хезмәттәшлек гамәлгә ашырыла. Сезнең Россия субъектлары белән хезмәттәшлекне киңәйтү өчен потенциалыгыз бар", - дип билгеләп үтте республика Рәисе.

"Татарстан белән Көньяк Осетия арасындагы мөнәсәбәтләрнең тарихы дистә еллар тәшкил итә. Хәзер товар әйләнешен арттыру өлкәсендә эшне көчәйтергә кирәк", - диде ул.

Рөстәм Миңнеханов шулай ук Татарстан - нефть химиясе регионы, дип сөйләде. Республикада машина төзелеше, инновацион технологияләр, авыл хуҗалыгы, медицина, фармацевтика, туризм үсеш алган. Көньяк Осетия икътисадының кайбер юнәлешләр буенча үсеш өчен потенциалы бар, мәсәлән, авыл хуҗалыгы, туризм, эшкәртү производстволары булдыру, дип өстәде ул.

Чыгышының азагында Республика Рәисе Көньяк Осетия делегациясен Татарстанда уза торган халыкара форумнарга чакырды.

Көньяк Осетия Президенты вазифаларын башкаручы Марат Камболов Рөстәм Миңнехановка җылы кабул итүләре өчен рәхмәт белдерде.

"Татарстан безнең өчен бер үк вакытта милли үзенчәлегебезне, гореф-гадәтләребезне һәм мәдәниятебезне саклап калу һәм шул ук вакытта заманча, көчле икътисад төзү үрнәге. Көньяк Осетия өчен мондый тәҗрибә аеруча кызыклы. Без 2008 елның августындагы фаҗигале вакыйгалардан соң Татарстанның Көньяк Осетиягә күрсәткән ярдәмен хәтерлибез һәм рәхмәтлебез. Бүген, Россия Президенты Владимир Путин йөкләмәсен үтәп, без бу тарихны иҗат итү һәм уртак эш аша дәвам итә алабыз", — дип ассызыклады Марат Камболов.

БЕЗНЕҢ МАКС КАНАЛЫНА ЯЗЫЛЫГЫЗ!