Татарстан Рәисе Рөстәм Миңнехановка Татарстанда Россия-Һиндстан сәламәтлек үзәге булдырырга тәкъдим ителде. Бу идеяне «TIME: Россия – Һиндстан. Үзара нәтиҗәлелек» форумының эшлекле иртәнге ашында AYUSH министрлыгы (Һиндстан хөкүмәтенең традицион медицина системаларын үстерү, тикшерү һәм тарату өчен җаваплы министрлык) секретаре Раджеш Кумар Котеча әйтте.
«Тәкъдимнәрнең берсе – Татарстанга инвестицияләр җәлеп итү. Һиндстанда җирле базарда эшләү теләге булган күп кенә эшмәкәрләр бар. Алар Казанда сәламәтлек үзәге булдыра алалар. Бу бик яхшы башлангыч – SPA-үзәкле курорт, ул Россия-Һиндстан проекты өчен яхшы үрнәк була ала», – диде чит ил кунагы.
Моннан тыш, ул Казанда традицион Һиндстан медицинасын үстерү буенча эшче төркем булдырырга тәкъдим итте, бу шәһәрне Россиядә әлеге бизнесны үстерү өчен башлангыч нокта итәр иде.
«Бу юнәлештә без Казан федераль университеты белән хезмәттәшлек итәргә телибез: бергәләп шушы өлкәдә клиник тикшерүләр үткәрә алабыз. Бу фәнни өлкәгә өлеш кертәчәк һәм Һиндстанның традицион медицинасына карашны үзгәртәчәк. Моның нигезендә зур икътисади потенциал да тора», – дип ассызыклады ул.
Үз чиратында, Рөстәм Миңнеханов Һиндстан эшмәкәрләрен Татарстанны җентекләп өйрәнергә чакырды һәм республиканың Һиндстан бизнесы өчен Россия базарына керү ноктасы булырга әзер булуын билгеләп үтте.
«Без ярдәм күрсәтергә әзер», – диде ТР Рәисе.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез