Компания «Шүрәле» исемен товар билгесе итеп теркәде һәм образны куллану өчен компенсация таләп итте. Әмма Татарстанның Монополиягә каршы хезмәте (УФАС) моны халык символын үзләштерергә һәм матди файда алырга омтылу дип бәяләде.
«Элеккеге ЦУМ бинасында Халык сәнгать кәсепләре һәм осталар үзәге төзелү сәбәпле, Шүрәле образын яклау аеруча мөһим. Шүрәле образы, милли геройларның берсе буларак, рәссамнарны һәм һөнәрчеләрне ирекле рәвештә илһамландырырга тиеш. Аны үз мәнфәгатьләреннән чыгып эш итүче коммерция структурасы монополияләштерүгә юл куярга ярамый», – дип билгеләп үтте Татарстанның Монополиягә каршы хезмәте (УФАС).
Ведомствода шулай ук Шүрәле образы республика халкының уртак мәдәни байлыгы булуын һәм шәхси милеккә әйләнә алмавын ассызыкладылар.
«Милли уенчыклар» компаниясенең гамәлләре, компания теркәгән товар билгеләрен куллануны тыеп һәм әлеге образларны кулланган өчен компенсация түләттереп, милек файдасы алуга юнәлтелгән. Милли символны хосусыйлаштыру омтылышы төбәкнең мәдәни мохитенә җитди зыян китерергә, Шүрәле образы белән сәнгать әсәрләре, сувенир продукциясе һәм башка проектлар булдыру мөмкинлеген чикләргә мөмкин иде», – дип өстәделәр Татарстанның Монополиягә каршы хезмәтендә (УФАС).
Интеллектуаль хокуклар суды Монополиягә каршы хезмәтнең нәтиҗәләре белән килеште һәм «Милли уенчыклар» компаниясенең гамәлләрен намуссыз көндәшлек дип таныды.
Исегезгә төшерик, 2024 елның октябрендә «Милли уенчыклар» җаваплылыгы чикләнгән җәмгыяте «Әкият» татар дәүләт курчак театрына судка кадәр дәгъва белдерде. Компания татар фольклоры геройлары – Шүрәле һәм Су анасы исемнәрен кулланганы өчен 500 мең сум акча таләп итте. Соңрак дәгъвачы мәсьәләне «тыныч юл» белән бер сум өчен хәл итәргә ризалашты.
Узган елның августында Татарстан Арбитраж суды татар халык әкиятләре геройлары исемнәренә товар билгеләре турындагы эштә театрны яклады.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез