Татарстанда 47 меңнән артыграк кеше яшь ярымга кадәрге баланы карау буенча пособие ала

Татарстанда 47 700 ата-ана – яшь ярымга кадәрге баланы карау ялында. Аларның һәркайсына айлык пособие түләнә. Социаль фондның Татарстандагы бүлеге бу максатка 2 миллиард сумнан артыграк акча юллаган.

Пособиене ата-ана гына түгел, баланың башка туганнары яки опекуннары да рәсмиләштерә ала. Акча һәр ай саен – сабыйга яшь ярым тулганчы түләнә.

Аның күләме алдагы ике елдагы уртача керемнең 40 процентын тәшкил итә. Әмма минималь пособиедән ким булмаска тиеш. Быел Татарстанда түләүнең минималь күләме – 9 227,24 сум, ә максималь күләме – 49 123,12 сум.
Социаль фонд бүлеге, эш бирүчедән кирәкле мәгълүматлар алынганнан соң 10 эш көне эчендә, пособиене тәүге тапкыр түли. Алга таба акча һәр ай саен күчерелеп килә.

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!