Казанда Алинә Заһитованың фигуралы шуу үзәге бинасын төзүгә 1,29 миллиард сум биреләчәк. Акча Татарстан бюджетыннан юллана. Бу хакта “Татар-информ” Дәүләт сатып алулар сайтына урнаштырылган тендер мәгълүматларына таянып яза.
Заказчы – “Главстрой РТ” оешмасы. Эшләрне 2026 елның 1 декабренә төгәлләү күздә тотыла.
Документлар нигезендә, объект спорт һәм күнегүләр зонасына бүленәчәк. Беренче өлешендә – боз мәйданы һәм тамашачы трибунасы, икенчесендә – күнегүләр, акробатика һәм бию заллары, шулай ук бирегә йөрүчеләр өчен киенү-чишенү бүлмәсе урнаштырылачак.
Моннан тыш үзәктә прокатка тимераяк алу мөмкинлеге булдырыла. Шунда ук 25 урынлы кафетерий урнаштырылачак.
Исегезгә төшерәбез: Алинә Заһитованың фигуралы шуу мәктәбен ачарга ниятләве 2023 елның 16 июнендә мәгълүм булды. Ул Санкт-Петербург икътисадый форумында Татарстан Рәисе Рөстәм Миңнехановка шундый тәкъдимен җиткерде.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез