Татарстанда төбәк әһәмиятендәге курортлар исемлеге расланды

Татарстанда региональ әһәмияттәге дәвалау-савыктыру урыннары һәм курортлар исемлеге расланды. Татарстан Республикасы Министрлар Кабинетының тиешле боерыгын республика Премьер-министры Алексей Песошин имзалады.

Исемлеккә биш курорт кертелгән – «Крутушка», «Васильевский», «Бакирово», «Ижевские минеральные воды» һәм «Жемчужина», шулай ук бер дәвалау-савыктыру урыны – Тархан минераль җир асты сулары ятмасы.

Документта исемлек төзү зарурлыгы 2023 елның 4 августындагы 469-ФЗ номерлы Федераль закон таләбе белән аңлатыла, аның нигезендә «Табигый дәвалау ресурслары, дәвалау-савыктыру урыннары һәм курортлар турында» Федераль законга һәм башка закон актларына үзгәрешләр кертелгән.

Бу закон нигезендә, дәвалау-савыктыру урыны һәм курорт федераль яки төбәк әһәмиятенә генә ия булырга мөмкин.

Сүз уңаеннан, хәзерге вакытта Татарстанда “Һәр кешегә сәламәтлек” төбәк проекты гамәлгә ашырыла.