– Узып киткән кыш, шөкер, әллә ни салкын булмады. Коммуналь хезмәт күрсәтүчеләргә дә, шәт, туңабыз, начар җылытасыз, дип шикаятьләр килмәгәндер. Монысы – бер хәл. Кыш чагыштырмача җылы килгәч, җылыту өчен тотылган чыгымнар да азрак булырга тиеш. Әмма торакларны җылытучы оешмалар, моңа карап, коммуналь хезмәтләргә түләүне киметмәделәр. Әйтик, без үзебез узган ел 5700 – 6000 сум тирәсе түләсәк, бу кышта да шулай калды. Гаделлек булсын дисәк, халыкка акчаны кайтарып бирергә тиешләр ләбаса. Шәт, бу мәсьәлә бер мине генә борчымыйдыр.
Рафаэль САЛЬМУШЕВ
Сорауга РФ Дәүләт Думасы депутаты Айрат Фәррахов җавап бирә:
– Думага бу уңайдан байтак мөрәҗәгать килде. Халыкның борчылуы урынлы. Без – депутатлар да бу хакта уйланабыз, фикер алышабыз. Әмма бер төпле нәтиҗәгә килә алганыбыз юк әле. Хәзер, ирексездән өйдә утырырга туры килгәч, бу мәсьәләне хәл итүне бераз кичектерергә туры килә.