Казанның төп чыршысы Россиянең иң матур Яңа ел чыршылары исәбенә кергән. Бу хакта SuperJob сервисы матбугат хезмәте хәбәр итә. Сораштыруда катнашучыларның 63 проценты Татарстан башкаласының бәйрәм «сылуы»н матур дип әйткән.
Ә инде рейтингта беренче урында – Уфаның төп чыршысы. Биредә яшәүчеләрнең 66 проценты күңеленә хуш килгән ул. Воронеж чыршысы (62 процент) өченче урынга чыккан. Ә менә Волгоград һәм Санкт-Петербург шәһәрләрендә яшәүчеләр үзләренең бәйрәм күркеннән кемгә караганда да канәгатьсезрәк калган. Волгоград чыршысы – респондентларның нибары 41 процентына, ә Санкт-Петербургныкы 33 процентына гына ошаган. Сораштыру өчен һәр шәһәрдән – 700 кеше, ә Мәскәү белән Санкт-Петербургтан 1000әр кеше сайлап алынган.
