Алабуга районының ЗАГС бүлегендә беренче тапкыр бала табуны онлайн теркәгәннәр.Сабыйның әти-әнисе «Бала туу» суперсервисы хезмәтен кулланганнар.
Яңа хезмәт кысаларында бала туу турындагы электрон таныклык дәүләт хезмәтләренең федераль порталында шәхси кабинетка кертелә. Ата-аналарга барлык мәгълүматларны расларга, балага исем сайлап ЗАГСка электрон гариза юлларга гына кала.
Шул рәвешле бала әти-әнисе ЗАГСка килмәгән килеш кенә теркәлә. Соңрак туу турындагы таныклыкның кәгазь формадагысын алырга мөмкин.
