4 кредит алуын иреннән яшергән хатын-кыз гаебен мошенникларга аудармакчы булган

Судта билгеләнгәнчә,  Кош-Агач районында яшәүче 24 яшьлек хатын-кыз барлыгы 200 мең сумнан артыграк күләмдә 4 кредит рәсмиләштергән. Банктан әҗәткә алган бөтен акчасын үзенең кирәк-ярагына тоткан. Бурычын ире белеп алгач, тегенең ачулануыннан куркып, бернинди кредит алмавын белдергән.

Шуңа күрә, янәсе, мошенниклар алдады, дип кенә аңлатырга карар иткән. Бу хакта “Российская газета” Кош-Агач районы прокуратурасы мәгълүматларына таянып яза. “Хатын-кыз, банктан 4 кредит алганлыгын иреннән яшерергә маташып, янәсе, мошенниклар карамагына эләгүе, кемнеңдер аның исеменә кредит рәсмиләштерүе турында гариза белән эчке эшләр органнарына мөрәҗәгать иткән”, – дип хәбәр иткән район прокуратурасы. Тикшерү барышында биредә аферистларның кулы уйнамаганлыгы ачыкланган.

Хатын-кызга карата яла ягу турында җинаять эше кузгатылган. Ул үз гаебен танып, кылган гамәле өчен үкенүен белдергән. Суд аңа 20 мең сум күләмендә штраф рәвешендәге җәза чарасы билгеләгән.

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!