Миңнеханов: «Кытай компанияләренең хезмәттәшлек итәргә кызыксынуын югары бәялибез»

Чарада ИТ, логистика, авиация тармагы, АСК, сәнәгать һәм башка өлкәләрдән Кытай бизнесы вәкилләре катнашты.

Рөстәм Миңнеханов очрашуда катнашучыларны-Кытай эшлекле җәмәгатьчелеге вәкилләрен сәламләде. Ул ассызыклаганча, Татарстан бизнес алып бару һәм инвестпроектларны гамәлгә ашыру өчен Россиянең иң уңайлы һәм җайлы төбәкләренең берсе буларак үз позицияләрен эзлекле рәвештә ныгыта.

Республика Рәисе билгеләп үткәнчә, Татарстан Россия – Кытай хезмәттәшлеген ныгытуга үз дәрәҗәсендә сизелерлек өлеш кертә. Татарстан белән Кытай арасында делегацияләр алмашу бара. Казанда – Кытайның Генераль консуллыгы, ә Пекинда Татарстанның Сәүдә-икътисадый вәкиллеге эшли. Кытай провинцияләре, компанияләре һәм югары уку йортлары белән килешүләр имзаланган һәм гамәлгә ашырыла. Казанны Шанхай һәм Санья шәһәрләре белән туры авиаэлемтә тоташтыра. Моннан тыш, Кытайга виза рәсмиләштерү кирәкми.

Икътисадның киләчәк үсешен тәэмин итүдә төп факторларның берсе дип Рөстәм Миңнеханов инвестицион проектларны гамәлгә ашыруны атады. “Чаллы” алгарышлы үсеш территориясендә дөньяда иң эре Кытай көнкүреш техникасы җитештерүчесе эшли, ул инде 6 заводны эшләтеп җибәргән. Шулай ук кайбер уртак җитештерүләр “Түбән Кама” һәм “Алабуга” МИЗ алгарышлы үсеш территориясендә урнашкан.

Республика Рәисе билгеләп үткәнчә, “Иннополис” МИЗ базасында сәнәгать хезмәттәшлеген үстерү перспектив юнәлеш булып тора. Рөстәм Миңнеханов Кытай партнерларына “Иннополис” МИЗның бер өлеше булган “Лаеш” индустриаль паркы территориясендә Россиядә җитештерүне локальләштерү белән кызыксынган компанияләр өчен Россия-Кытай сәнәгать мәйданчыгы булдыру мөмкинлеген карарга тәкъдим итте.

Республика Рәисе ассызыклаганча, Татарстанда яңа проектларны эшләтеп җибәрү генә түгел, ә аларны тиз арада киңәйтергә, нәтиҗәле локальләшү һәм кооперация чылбырын төзергә мөмкинлек бирә торган барлык шартлар да тудырылган.

“Татарстан Кытай бизнесы өчен барлык этапларда да ачык: базарга беренчел керүдән алып югары технологияле җитештерүләр һәм уртак эшләнмәләр урнаштыруга кадәр. Без бу этапларның барысында да тиешле ярдәм күрсәтергә әзер”, – диде Рөстәм Миңнеханов.

Ул машина төзелеше, нефть химиясе, югары технологияләр, электроника, энергетика, цифрлы хәл ителешләр һәм агросәнәгать комплексында Кытай партнерлары белән хезмәттәшлекне киңәйтүдә зур потенциал булуын билгеләп үтте. “Гади сәүдә белән тәэмин итүдән тирәнрәк сәнәгать партнерлыгына күчү, уртак җитештерүләр, тикшеренү үзәкләре һәм технологик кластерлар булдыру безнең өчен аеруча мөһим”, – дип белдерде Рөстәм Миңнеханов. 

Республика Рәисе Кытай компанияләрен Татарстан белән актив хезмәттәшлеккә чакырды.

БЕЗНЕҢ МАКС КАНАЛЫНА ЯЗЫЛЫГЫЗ!