Татарстан Россиянең тормыш сыйфаты иң югары булган төбәкләре бишлегенә керде

Бу хакта Стратегик инициативалар агентлыгының күзәтчелек советы утырышында агентлыкның генераль директоры Светлана Чупшева әйтте.

«Быел иң югары тормыш сыйфаты булган төбәкләр рейтингы лидерлары бишлегенә Мәскәү, Санкт-Петербург, Төмән өлкәсе, Татарстан Республикасы, Сахалин өлкәсе керде», – диде докладчы (ТАСС цитатасы).

Чупшева сүзләренчә, рейтингны төзегәндә статистик күрсәткечләрне бәяләүдән тыш, якынча 345 мең кеше арасында үткәрелгән сораштыру нәтиҗәләре дә исәпкә алынган. Сораштырулар яшьләр, күп балалы гаиләләр, инвалидлар арасында үткәрелгән. Бу ярдәм чараларының санын һәм нәтиҗәлелеген бәяләү өчен эшләнгән.

Рейтингны Стратегик инициативалар агентлыгы 2021 елдан башлап формалаштыра. Бу юлы ул яңартылган, Россия үсешенең илкүләм максатларын чагылдырган методология ярдәмендә төзелгән.

Сүз уңаеннан, хәзерге вакытта “Яшәү өчен инфраструктура” илкүләм проекты гамәлгә ашырыла.

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!