Тәтештә шаурма ашап бер бала үлгәннән соң ябылган “Нур” кафесында эчәклек таякчыклары һәм сальмонелла бактерияләре тапканнар. Бу хакта “Татар-информ” Роспотребнадзорның Татарстандагы идарәсе матбугат хезмәте хәбәренә таянып яза.
“Лаборатория тикшеренүләре нәтиҗәсендә шаурма өчен әзерләп куелган продукциядә, тавык итендә, өслекләрдә эчәклек таякчыклары бактерияләре табылган. Бу аш-су әзерләү тенологиясен һәм савыт-саба юу кагыйдәләрен үтәмәү турында сөйли. Чи тавык итенең сальмонелла белән зарарлануы ачыкланган”, – дип белдерелгән ведомствода.
Хәзерге вакытта кафеның бөтен продукциясе юк ителгән. Җәмәгать туклануы оешмасы эшчәнлеге 80 тәүлеккә туктатып торылган. Тикшерү бара.
Исегезгә төшерәбез: 23 августта 11 яшьлек кыз әлеге кафеда шаурма ашаганнан соң вафат булган. Санитар табиблар эпидемиологик тикшерү үткәргәндә кафеда күп таләпләрнең санга сугылмавын ачыклаган.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез